12 قازان كۇنى نۇر-سۇلتاندا رەسەيدىڭ قازاقستانداعى مادەنيەت كۇندەرى باستالادى, دەپ حابارلايدى Egemen.kz.
اتاپ ايتقاندا, 12 قازان كۇنى ساعات 19:00-دە «Qazaqstan» ورتالىق كونتسەرت زالىنىڭ ساحناسىندا جەتەكشى رەسەيلىك ورىنداۋشىلار مەن قازاق مەملەكەتتىك سيمفونيالىق وركەسترىنىڭ قاتىسۋىمەن گالا-كونتسەرت وتەدى.
كونتسەرتكە حالىقارالىق بايقاۋلاردىڭ لاۋرەاتتارى اننا اگلاتوۆا (سوپرانو), ۆلاديسلاۆ كۋپريانوۆ (باريتون), ۆلاديمير ماگومادوۆ (كونتراتەنور), كونستانتين ەمەليانوۆ (فورتەپيانو), الەكساندر رامم (ۆيولونچەل), گايك كازازيان (سكريپكا), اناستاسيا تيۋرينا (بالالايكا) قاتىسادى. سونىمەن قاتار قازاق انشىلەرى ونەر كورسەتەدى. ديريجەر پۋلتىندە – وسەتيا رەسپۋبليكاسى – الانيانىڭ ەڭبەك سىڭىرگەن ءارتىسى زاۋربەك گۋگكاەۆ.
12-19 قازان ارالىعىندا قازاقستان رەسپۋبليكاسىنىڭ ۇلتتىق مۇراجايىندا ۆولوگودسك مەملەكەتتىك تاريحي-ساۋلەت جانە ونەر مۇراجاي-قورىعىنىڭ جيناقتارى ۇسىنىلاتىن «ۆولوگودسك شىلتەرى» جىلجىمالى كورمەسى وتپەك. كورمەنىڭ رەسمي اشىلۋى – 12 قازان, ساعات 16:00-دە (قر ۇلتتىق مۇراجايى).
رەسەيدىڭ قازاقستانداعى مادەنيەت كۇندەرى رەسەي فەدەراتسياسىنىڭ مادەنيەت مينيسترلىگى جانە قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولداۋىمەن وتەدى.
شارانى ۇيىمداستىرۋشى – «روسكونتسەرت» فەدەرالدى مادەنيەت مەكەمەسى.
مادەنيەت كۇندەرى رەسەي مەن قازاقستاننىڭ مادەنيەت سالاسىنداعى ءداستۇرلى دوستىق ىنتىماقتاستىعىن نىعايتۋ مەن دامىتۋعا باعىتتالعان, سونىمەن قاتار شىنايى قۇندىلىقتار مەن مادەني مۇرالاردى ودان ءارى ساقتاۋعا ىقپالداسۋعا شاقىرادى.