2021 جىلدىڭ 9-10 قازانىندا تۇركىستان مۋزىكالىق دراما تەاترى بەلگىلى دراماتۋرگ, قر مەملەكەتتىك سىيلىعى لاۋرەاتى دۋلات يسابەكوۆتىڭ پەساسىنا قويىلاتىن «بورتە» سپەكتاكلىمەن تۇڭعىش رەت شىمىلدىعىن اشادى, دەپ حابارلايدى Egemen.kz.
بورتە الەم تاريحىنداعى ۇلى قايراتكەرلەردىڭ ءبىرى, شىڭعىس حاننىڭ قوڭىرات تايپاسىنان العان العاشقى ايەلى. بورتەگە ارنالعان تۇڭعىش شىعارما قازاق ساحناسىندا دا تۇڭعىش رەت قويىلىپ وتىر. قويىلىم 10-11 جاستاعى تەمۋچين (شىڭعىس حاننىڭ شىن ەسىمى) مەن بورتەنىڭ العاش تانىسۋىنان باستالىپ, شىڭعىس قاعاننىڭ الىپ يمپەريانى باسقارىپ تۇرعان كەزەڭىن قامتيدى. بۇل كەزەڭدە تەمۋچين الاۋىزدىق جايلاعان موڭعول تايپالارىن ءبىرتۇتاس مەملەكەتكە بىرىكتىرىپ, شىڭعىس قاعان اتانادى. شىڭعىس حان اسكەرىنىڭ جەڭىستى جورىعى قىتايدان باستالىپ, ۋكراينادا بولعان اتاقتى «كالقا وزەنى بويىنداعى شايقاسقا» دەيىن جەتەدى. سپەكتاكلدە وجەت تە قايسار, اجارلى دا اقىلدى, باتىر دا باتىل, ءبىر باسىندا دراماسى مەن تراگەدياسى جەتىپ-ارتىلاتىن قايسار ايەل بورتە حانىمنىڭ عۇمىرى باياندالادى.
«بورتە» سپەكتاكلىن قويۋعا بەلگىلى يتاليالىق رەجيسسەر داۆيدە ليۆەرمور (Davide Livermore) شاقىرىلدى. قويىلىمنىڭ كوركەمدىك جەتەكشىسى - اينۇر كوپباساروۆا, رەجيسسەر - كارلو شاككالۋگا (Carlo Sciaccaluga), ستسەنوگراف– اننا ۆارالدو (Anna Varaldo), كوورديناتور - ەليس فەررانتي (Alice Ferranti), دەكوراتور-سۋرەتشى - جانات كوكىمبەكوۆ, كوستيۋم بويىنشا سۋرەتشى – ايجان ابدۋايت, كومپوزيتور - حاميت شانعاليەۆ, ادەبي رەداكتور – شىنار وماروۆا, جارىق بويىنشا سۋرەتشى - داۋرەن ساماشوۆ, بالەتمەيستەر – اسەم الديبەكوۆا, مادينا مۋراتپەكوۆا, داۋلەت مۇراتپەكوۆ, گريم بويىنشا سۋرەتشى – ادەل نۇرقاسىموۆا جانە تۇركىستان مۋزىكالىق دراما تەاترىنىڭ جاس دراما اكتەرلارى جانە بالەت ارتىستەرى.
تاريحي سپەكتاكلدىڭ عىلىمي كەڭەسشىسى: تاريحشى, تاريح عىلىمدارىنىڭ كانديداتى, دوتسەنت نۇرلان اتىعاەۆ. رولدەردە وينايتىن ارتىستەر: ايا ءشارىپ, اقبوتا قايماقباەۆا, نۇركەن وتەۋىلوۆ, ەركەبۇلان دايىروۆ, لەيلو بەكنازار-حانينگا, ءادىل احمەتوۆ, الماحان كەنجەبەكوۆا, اليحان يدرىشەۆا, ەرجان نۇرىمبەت, نارتاي ساۋدانبەك ۇلى, قونىسبەك بەگايداروۆ, زامزاگۇل بەگايداروۆ, التىناي نوگەربەك, ازامات چۋكەەۆ, تولقىن نۇربەكوۆا, ءاشىم احمەتوۆ, قۋانىش قونىسبەكوۆ, ايگەرىم قايراتقىزى.
دەكوراتسيا شىنايلىعىمەن, ساحنالىق كيىمدەر تارتىمدىلىعىمەن, رەكۆيزيتتەر شەبەرلەردىڭ ارنايى دايىنداۋىمەن ەرەكشەلەنەدى. بەلگىلى كومپوزيتور حاميت شاڭعاليەۆ سپەكتاكلگە ارناپ ەكسكليۋزيۆتى مۋزىكا جازدى.
تەاتر ديرەكتورى ءارى كوركەمدىك جەتەكشىسى اينۇر كوپباساروۆانىڭ ايتۋىنشا, الداعى ۋاقىتتا دا وزىق تەحنيكالىق جانە كرەاتيۆ شەشىمدەرگە نەگىزدەلگەن تىڭ قويىلىمدار قالا تۇرعىندارى مەن قوناقتارىنا كوپتەپ ۇسىنىلاتىن بولادى.
تۇركىستان مۋزىكالىق دراما تەاترى قر تۇڭعىش پرەزيدەنتى, ەلباسى ن.نازارباەۆتىڭ قولداۋىمەن سالىنعان تۇركى الەمى استاناسىنىڭ ەڭ ساۋلەتتى عيماراتتارىنىڭ ءبىرى. 2021 جىلدىڭ مامىر ايىندا ەلباسى ارنايى كەلىپ جاڭا تەاتردىڭ اكتەرلىق قۇرامىمەن جانە ساحنانىڭ تەحنيكالىق مۇمكىندىكتەرىمەن تانىسقان ەدى.