نيگەريادا كوروناۆيرۋس ىندەتىمەن قاتار تىرىسقاق دەرتى دەندەپ بارادى. بۇگىنگى كۇنگە دەيىن كەسەلدەن 2300 ادام كوز جۇمدى, دەپ حابارلايدى Egemen.kz.
اۋرۋدى باقىلاۋ جانە الدىن الۋ ورتالىعى ەلدىڭ 25 شتاتىندا اۋىرعاندار سانى 70 مىڭعا جۋىقتاعانىن ايتادى. سوڭعى ءبىر اپتانىڭ وزىندە 46 ادامنىڭ ءومىرىن جالماعان. سۋ تاسقىنىنان زارداپ شەگىپ, سانيتارلىق جاعداي كوڭىل كونشىتپەيتىن اۋدانداردا اۋرۋدى ەكىنشى مارتە جۇقتىرىپ جاتقانداردىڭ قاتارى ارتقان.
ايتا كەتەيىك, ەلدە كورونايۆرۋستىڭ دەلتا شتامى كەڭ ەتەك جايعان. ازىرگە حالىقتىڭ تەك 1 پايىزى عانا ۆاكتسينانىڭ ەكى دوزاسىن قابىلداعان. «COVID-19 بەن تىرىسقاق ىندەتىنىڭ ۋشىعۋى ەلدىڭ دەنساۋلىق ساقتاۋ سالاسىنا ۇلكەن اۋىرتپاشىلىق تۇسىرۋدە. مەديتسينا قىزمەتكەرلەرىنە دە وڭاي بولماي تۇر. ىندەتپەن كۇرەسۋ جۇمىستارىنا قوماقتى قاراجات قاجەت. ءبىرىنشى كەزەكتە العاشقى مەديتسينالىق-سانيتارلىق كومەك كورسەتۋ جۇيەسىن جونگە كەلتىرگەنىمىز ءجون», دەيدى دارىگەر اكاكنيمو ەبونگ.