قازاقستاننىڭ ۇلتتىق جوعارى وقۋ ورنىندا ۆيرۋسولوگ-ماماندار دايارلانادى, دەپ حابارلايدى Egemen.kz قر ءبىلىم جانە عىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
ء«ال-فارابي اتىنداعى قازۇۋ بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىمەن (بقپعزي) بىرلەسە وتىرىپ, ۆيرۋسولوگ-مامانداردى دايارلايتىن بولادى. اڭگىمە ماگيسترانتتار مەن دوكتورانتتار تۋرالى بولىپ وتىر. ءتيىستى تاپسىرمانى ءبىلىم جانە عىلىم ءمينيسترى اسحات ايماعامبەتوۆ تاعايىندادى. ول پاندەميا ەپيدەميولوگيا جانە ۆيرۋسولوگيا سالاسىنداعى مامانداردى دايارلاۋ قاجەتتىلىگىن اتاپ ءوتتى», دەلىنگەن حابارلامادا.
سونداي-اق, ۆەدومستۆودا قر بعم بقپعزي قىزمەتكەرلەرى قازاقستاندىق Covid-19 ۆاكتسيناسىن ازىرلەگەنىن ەسكە سالدى. ۇلتتىق جوعارى وقۋ ورنىنىڭ رەكتورى ج.تۇيمەباەۆ پەن بيولوگيالىق قاۋىپسىزدىك پروبلەمالارى عزي باس ديرەكتورى ك.زاكاريا ءتيىستى كەلىسىمگە قول قويدى. قازىر قازۇۋ بقپعزي-مەن بىرلەسىپ ۆيرۋسولوگيا سالاسىندا جاڭا ءبىلىم بەرۋ باعدارلاماسىن ازىرلەدى.
«قازاق ۇلتتىق ۋنيۆەرسيتەتى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىمەن العاش رەت بىرلەسىپ, ۆيرۋسولوگ-مامانداردى دايارلايتىن بولادى. بۇرىن باكالاۆرياتتىڭ ۇقساس ءبىلىم بەرۋ باعدارلامالارىن وقىعان جوعارى وقۋ ورىندارىنىڭ تۇلەكتەرى وقي الادى. ولار قازۇۋ بيولوگيا جانە بيوتەحنولوگيا فاكۋلتەتىنىڭ بازاسىندا جانە بقپعزي BSL-2 جانە BSL-3 زەرتحانالارىندا ءبىلىم الاتىن بولادى. ۆيرۋسولوگتاردى دايارلاۋ كەزىندە ستۋدەنتتەردىڭ تەوريالىق عانا ەمەس, سونىمەن قاتار پراكتيكالىق ءبىلىم الۋىنا باستى نازار اۋدارىلادى. جەتەكشى ۆيرۋسولوگتار زەرتتەۋ مەن دياگنوستيكانى قالاي جۇرگىزۋ كەرەكتىگىن, ۆيرۋستىڭ جاڭا تۇرلەرىن قالاي انىقتاۋ كەرەكتىگىن كورسەتەدى. سونداي-اق, ءبىلىم الۋشىلار مولەكۋليارلىق بيولوگيا, بيوحيميا, ميكروبيولوگيا ادىستەرىن مەڭگەرەدى», دەپ اتاپ ءوتتى ءبىلىم جانە عىلىم ۆيتسە-ءمينيسترى قۋانىش ەرعاليەۆ.
پراكتيكالىق ساباقتار باسىم بولعاندىقتان, ستۋدەنتتەر بقپعزي بازاسىندا تاجىريبەدەن جانە تاعىلىمدامادان وتەدى. ينستيتۋت عالىمدارى, سونىڭ ىشىندە كوروناۆيرۋسقا قارسى ۆاكتسينا جاساعاندار ۆيرۋسولوگيا, بيولوگيا جانە بيوتەحنولوگيا سالاسىندا پراكتيكالىق ساباقتار, ماستەر-كلاستار, سەمينارلار وتكىزەدى. وقۋدى اياقتاعاننان كەيىن, جاقسى ءبىلىمدى كورسەتكەن جاعدايدا, تۇلەكتەردى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنا جۇمىسقا ورنالاستىرۋعا بولادى.
بۇدان ءارى بيولوگيالىق قاۋىپسىزدىك پروبلەمالارى عزي بازاسىندا دوكتورلىق جۇمىستاردى قورعاۋ جونىندەگى ديسسەرتاتسيالىق كەڭەس قۇرىلاتىن بولادى. عىلىمي-زەرتتەۋ جۇمىستارىن جۇرگىزۋ كەزىندە ادىستەمەلىك-كونسۋلتاتسيالىق سيپاتتاعى كومەك كورسەتۋ ءۇشىن شەتەلدىك عالىمداردى تارتۋ كوزدەلەدى.
سونداي-اق, مينيسترلىكتىڭ ءباسپاسوز قىزمەتى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ بيولوگيالىق قاۋىپسىزدىك, بيوتەحنولوگيا, ۆيرۋسولوگيا, ميكروبيولوگيا, يممۋنولوگيا سالاسىندا ۇلكەن تاجىريبەسى بار ەكەنىن اتاپ ءوتتى. ينستيتۋت عالىمدارى پرەپاراتتاردىڭ 60-تان استام اتاۋىن, ونىڭ ىشىندە 30 ۆاكتسينانى, 16 تەست-جۇيەنى جانە 15-تەن استام ءتۇرلى بيوپرەپاراتتاردى ازىرلەپ, ەنگىزدى. سوڭعى 10 جىلدا ينستيتۋت اسا قاۋىپتى ينفەكتسيالار بويىنشا ۆاكتسينالاردى, ونىڭ ىشىندە وتاندىق QazVac ۆاكتسيناسىن دايىنداۋ تەحنولوگياسىن جاسادى.