جامبىل وبلىسىنداعى «ايشا-ءبيبى» وقۋ-جاتتىعۋ پوليگونىندا قازاقستان مەن ءۇندىستان اسكەري قىزمەتشىلەرى اراسىندا «قازۇندى-2021» بىرلەسكەن وقۋ-جاتتىعۋى وتۋدە, دەپ حابارلايدى Egemen.kz قر قورعانىس مينيسترلىگىنىڭ رەسمي سايتىنا سىلتەمە جاساپ.
وعان قازاقستاننان «وڭتۇستىك» وڭىرلىك قولباسشىلىعىنىڭ بولىمشەلەرى جانە ءۇندىستاننىڭ قۇراما روتاعا بىرىكتىرىلگەن اسكەري كونتينگەنتى قاتىسۋدا.
ءبىرىنشى كەزەڭدە جەكە قۇرام جاۋىنگەرلىك دايارلىقتىڭ جوعارى دەڭگەيىنە كەلتىرۋ ءىس-قيمىلدارىن پىسىقتادى. حالىقارالىق بولىمشەلەردىڭ اسكەري قىزمەتشىلەرى داعدارىس اۋدانىنا مارش جاسادى. قازىرگى ۋاقىتتا مەجەلى جەردە روتالىق تاكتيكالىق قۇراما توپ بولىمشەلەردى جاۋىنگەرلىك ۇيلەستىرۋدى ورىندادى.
وقۋ-جاتتىعۋ شەڭبەرىندە قوسىمشا بولىمشەنىڭ اسكەري قىزمەتشىلەرى بارلاۋ-ىزدەستىرۋ جانە رەيدتىك ءىس-قيمىلدار جۇرگىزەدى. وقۋ-جاتتىعۋدىڭ سوڭعى كەزەڭىندە بۇۇ-نىڭ مانداتىنا سايكەس داعدارىس ايماعىندا زاڭسىز قارۋلانعان توپتاردى وقشاۋلاۋ جانە جويۋ جوسپارلانعان.
«قازۇندى-2021» بىرلەسكەن وقۋ-جاتتىعۋى قازاقستان مەن ءۇندىستان قورعانىس مينيسترلىكتەرى اراسىنداعى ەكىجاقتى ىنتىماقتاستىق جوسپارى شەڭبەرىندە وتكىزىلۋدە. ول اعىمداعى جىلدىڭ 10 قىركۇيەگىندە اياقتالادى.
وقۋ-جاتتىعۋ الاڭىندا سانيتارلىق-ەپيدەميولوگيالىق تالاپتاردىڭ قاتاڭ ساقتالعان. وعان قاتىسۋشىلار بارلىق قاجەتتى كارانتيندىك ءىس-شارالاردان, مەديتسينالىق تەكسەرىستەن ءوتىپ, پتر-تەست تاپسىردى.