جامبىل وبلىسىندا بولعان توتەنشە جاعداي تۋرالى جالعان اقپارات تاراتقان جاس جىگىت ۇستالدى, دەپ حابارلايدى Egemen.kz قر ءىىم رەسمي سايتىنا سىلتەمە جاساپ.
«جامبىل وبلىسىنداعى جارىلىستار تۋرالى الەۋمەتتىك جەلىلەردە جالعان اقپارات تاراتقان ازامات ۇستالدى. 27 تامىزدا ينتەرنەت جەلىسىنە مونيتورينگ جۇرگىزۋ بارىسىندا Instagram جەلىسىندە بەلگىسىز بىرەۋدىڭ داۋىستىق سۇيەمەلدەۋمەن ۆيدەو جاريالاعانى انىقتالدى. ەر ادامنىڭ ايتۋى بويىنشا بايزاق اۋدانىندا ورنالاسقان اسكەري ءبولىمنىڭ اۋماعىندا بولعان جارىلىستاردى ونىڭ قۋاتىنا بايلانىستى جويۋ مۇمكىن ەمەس, كوپتەگەن زارداپ شەككەندەر, ونىڭ ىشىندە دەنە مۇشەلەرى بولشەكتەنىپ قالعاندار دا بار دەگەن. بۇل اقپارات شىندىققا سايكەس كەلمەيدى», دەلىنگەن حابارلامادا.
ءىىم ءمالىم ەتكەندەي, جەدەل-ىزدەستىرۋ شاراسى بارىسىندا پوليتسيا قىزمەتكەرلەرى وبلىستىڭ 26 جاستاعى تۇرعىنىن انىقتاپ, ۇستادى جانە كۇدىكتى ءوز كىناسىن تولىق مويىنداعان.
«اتالعان فاكتى بويىنشا قر قك-ءنىڭ 274-بابى 2-بولىگىنىڭ 3-تارماعى «قوعامدىق ءتارتىپتى بۇزۋ, بۇقارالىق اقپارات قۇرالدارىن نەمەسە تەلەكوممۋنيكاتسيا جەلىلەرىن پايدالانۋ قاۋپىن تۋدىراتىن جالعان اقپارات تاراتۋ» بويىنشا سوتقا دەيىنگى تەرگەۋ جۇرگىزىلۋدە. مۇنداي قىلمىستى جاساعانى ءۇشىن ءۇش جىلعا دەيىن باس بوستاندىعىنان ايىرۋ جازاسى قاراستىرىلعان», دەيدى ۆەدومستۆودان.
سونداي-اق رەسمي حابارلامادا قر قىجك 201-بابىنا سايكەس سوتقا دەيىنگى تەرگەۋ ارەكەتتەرى جۇرگىزىلۋىنە بايلانىستى قوسىمشا اقپاراتتىڭ جاريالاۋعا بولمايتىندىعى ايتىلعان.