بەرەكەتىمىزدى قاشىرعان بالەكەت ىندەت بارعان سايىن ۇرەيىمىزدى ۇشىرىپ, ۇدەپ بارادى. القىمنان الاتىن ادۋىنى قاتتى اۋرۋ اينالامىزداعى تالاي جاقسى مەن جايساڭنان ايىرىپ جاتىر. كەشە عانا ەسەن-ساۋ, ەلگە ەس بولىپ جۇرگەن تۇلعالارىمىزدىڭ كەنەتتەن كەساپات كەسەلدىڭ كەسىرىنەن قايتىس بولعانىن ەستىگەن جۇرت اجەپتاۋىر ەسەڭگىرەپ قالدى. جالپى, ەلىمىزدە كۇن سايىن جۇزدەن اسا ادامنان كوز جازىپ قالىپ جاتىرمىز.
كۇنى كەشە كوروناۆيرۋستان 118 ازاماتىمىز قايتىس بولىپ, قانشاما وتباسى ازا تۇتتى. ونىڭ الدىندا عانا 123 ادام باقيلىق بولعان. ال 13 تامىزدا 152 ادامنىڭ جانى ءۇزىلىپ, بۇعان دەيىن بولماعان, ءبىر كۇندە ىندەتتەن كوز جۇمعان ەڭ سوراقى كورسەتكىش تىركەلدى. وسىلايشا, بۇل قاتەر ونسىز دا از-اق قازاقتىڭ قاتارىن كەمىتىپ, «جانىمىزدىڭ جاپىراقتارىن بىلدىرتپەي ج ۇلىپ جاتىر». سونى بايقاپ-بىلسەك, سەزىنسەك, وپىنىپ-وكىنىپ بارماق تىستەسەك, وسىلاي ءالى دە بەيقام, سەلقوس جۇرەر مە ەدىك؟! ءاي قايدام, بۇل نەمقۇرايلىعىمىزبەن قاۋىپتى دەرتكە قارسى قىلار قايران بولماس.
وكىنىشكە قاراي, وسى اۋرۋدان تاپقان ازابىمىز, قازامىز ازايماي تۇرسا دا, ىندەتتىڭ تارالۋىن كۇشەيتەتىن توي-تومالاقتار تىيىلار ەمەس. تويدى دوعارۋعا, ءتارتىپ ساقتاۋعا, ۆاكتسينا سالدىرۋعا دەگەن سالعىرتتىق ناۋقاستاردىڭ دا, مارقۇمداردىڭ دا سانىن ارتتىرىپ جاتىر.
جالپى, بۇگىنگى تاڭدا ەلىمىزدە 120 488 ادام كوروناۆيرۋس ينفەكتسياسىنان ەمدەلۋدە, ولاردىڭ ىشىندە 30 996 پاتسيەنت ستاتسيوناردا, 89 492 ناۋقاس امبۋلاتورلىق دەڭگەيدە ەم قابىلداۋدا. سونداي-اق ىندەتكە شالدىققانداردىڭ اراسىندا 910 ادامنىڭ جاعدايى اۋىر, 529 پاتسيەنتتىڭ جاعدايى وتە اۋىر, 251 ناۋقاس ءوجج اپپاراتىندا جاتىر.