دزيۋدودان توكيو وليمپياداسىنىڭ جەرەبە تارتۋ ءراسىمى اياقتالىپ, قازاقستاندىق سپورتشىلاردىڭ العاشقى اينالىمداعى قارسىلاستارى انىقتالدى, دەپ حابارلايدى Egemen.kz.
سپورتشىلارىمىزدىڭ قارسىلاستارى «سەن تۇر, مەن اتايىندار»:
60 كيلودا سىنعا تۇسەتىن ەلدوس سمەتوۆ وليمپيادا ويىندارىن ەكىنشى اينالىمنان باستايدى. سمەتوۆتىڭ قارسىلاسى – م.اققۇس (تۇركيا) پەن نامگەل نگاۆانگ (بۋتان) جۇبىنىڭ جەڭىمپازى بولماق.
66 كيلو سالماقتا تاتاميگە شىعاتىن ەرلان سەرىكجانوۆتىڭ العاشقى قارسىلاسى – الەم چەمپيوناتىنىڭ كۇمىس جانە قولا جۇلدەگەرى, ەۋروپا چەمپيونى, ازەربايجاندىق ورحان سافاروۆ.
73 كيلو سالماق دارەجەسىندەگى جانساي سماعۇلوۆتىڭ جاعدايى دا ءماز ەمەس. ونىڭ قارسىلاسى – فەرديناند كاراپەتيان. ارمەنيالىق سپورتشى 2018 جىلى ەۋروپا چەمپيونى اتانعان.
81 كيلو سالماقتاعى ديدار حامزا توكيو ويىندارىنداعى ءبىرىنشى بەلدەسۋدە الەم چەمپيونى سايد موللايمەن جولىعادى.
90 كيلو سالماقتا بەلدەسەتىن يسلام بوزباەۆ العاشقى اينالىمدا ەۋروپا چەمپيوناتىنىڭ ەكى دۇركىن قولا جۇلدەگەرى, ازەربايجاندىق مامەدالى مەحديەۆپەن بەلدەسەدى.
48 كيلو سالماقتا ايەلدەر اراسىندا قازاقستان اتىنان جالعىز ءوزى سىنعا تۇسەتىن ريو وليمپياداسىنىڭ جۇلدەگەرى گالبادراح وتگونتسەتسەگتىڭ ءبىرىنشى اينالىمداعى قارسىلاسى ازيانىڭ ەكى دۇركىن جەڭىمپازى, قىتايلىق لي يانيان بولماق.