COVID-19 احۋالى ورشۋىنە بايلانىستى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋس مالىمدەمە جاسادى. ول باي ەلدەردى ۆاكتسينانى كەدەي ەلدەرمەن بولىسۋگە شىقىردى, دەپ حابارلايدى Egemen.kz بۇۇ-نىڭ جاڭالىقتار ورتالىعىنا سىلتەمە جاساپ.
«10 اپتادان بەرى ازايعان ءولىم كورسەتكىشى قايتا وسۋدە. بىزگە الەمنىڭ بارلىق وڭىرلەرىنەن اۋرۋحانالاردىڭ قايتادان تولىپ جاتقانى تۋرالى حابارلار تۇسۋدە. ۆيرۋستىڭ Delta نۇسقاسى جۇقتىرۋ جاعدايلارى مەن ءولىم سانىنىڭ ورشۋىنە اكەلۋدە», دەدى تەدروس جەنەۆاداعى بريفينگتە.
قازىرگى كەزدە Delta الەمنىڭ 104 ەلىندە انىقتالعان. ددسۇ باسشىسىنىڭ ايتۋىنشا, ول الەم بويىنشا ەڭ كوپ تارالعان نۇسقاعا اينالماق.
«ۆاكتسينامەن قامتۋ تومەن ەلدەردەگى احۋال قيىن. Delta جانە باسقا نۇسقالار مۇنداي ەلدەردە جۇقتىرۋدىڭ قاۋىپتى تولقىنىن تۋدىرىپ, اۋرۋحاناعا ءتۇسۋ مەن ءولىمنىڭ جوعارى كورسەتكىشتەرىنە اكەلەدى», دەپ اتاپ ءوتتى ددسۇ-نىڭ باسشىسى.
ونىڭ ايتۋىنشا, ءتىپتى الدىڭعى تولقىندا وزدەرىنىڭ دەنساۋلىق ساقتاۋ جۇيەلەرىنىڭ ارقاسىندا ينفەكتسيانىڭ ماسشتابتى ءورشۋىن الدىن العان ەلدەردىڭ وزدەرى بۇگىنگى كۇنى پاندەميا ەپيتسەنترىندە قالىپ وتىر.
ددسۇ-نىڭ باس ديرەكتورى تەك قانا ۆاكتسينانىڭ كومەگىمەن داعدارىستان شىعا المايتىمىزدى مويىندادى, الايدا, ونىڭ ايتۋىنشا, ۆاكتسينالاۋ – ۆيرۋسپەن كۇرەستەگى قولدا بار قۇرالداردىڭ ەڭ ءتيىمدىسى.
ء«بىز بۇگىن قوعامدىق دەنساۋلىق ساقتاۋ سالاسىنداعى توتەنشە جاعدايدىڭ ءورشۋىن باستان كەشۋدەمىز. ول, ءوز كەزەگىندە, ادامداردىڭ ومىرىنە, ولاردىڭ تىرشىلىك ەتۋ قۇرالدارىنا جانە الەم ەكونوميكاسىن قايتا قالپىنا كەلتىرۋگە ودان سايىن قاۋىپ ءتوندىرىپ وتىر», دەدى ددسۇ-نىڭ وكىلى.
ونىڭ ايتۋىنشا, احۋال ۆاكتسينا قورى از جەرلەردە ناشار, دەگەنمەن پاندەميا ەش جەردە بىتكەن جوق.
«قازىرگى ۇجىمدىق ستراتەگيا مەنىڭ ەسىمە ورمان ورتىمەن كۇرەسۋشى ءورت ءسوندىرۋ كومانداسىن سالادى. سۋ قۇيۋ ارقىلى ءبىر جەردەگى الاۋدى اۋىزدىقتاۋعا بولادى, بىراق باسقا جەردە وت لاۋلاپ تۇرسا, شوقتار جان-جاققا تاراپ, قايتادان قورقىنىشتى جالىنعا اينالادى», دەدى تەدروس.