شىلدە ايىنىڭ باسىنان بەرى ەلىمىزدە 1682 بالا كوروناۆيرۋس جۇقتىرعان, دەپ حابارلايدى Egemen.kz.
ورتالىق كوممۋنيكاتسيالار قىزمەتىندە سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا وسىنداي ستاتيستيكا كەلتىردى.
«بالالار تۋرالى ايتساق, قاڭتار ايىنان بەرى 28 267 بالا كوروناۆيرۋسپەن اۋىرعان. ونىڭ ىشىندە 54 جاڭا تۋعان نارەستە بار. شىلدەنىڭ 7 كۇنىندە 1 682 بالانىڭ ۆيرۋس جۇقتىرعانى تىركەلدى. ياعني, شىلدەنىڭ عانا مالىمەتى بالالار اراسىندا سىرقاتتانۋدىڭ ۇلەسى ارتقانىن ايتۋعا بولادى. بۇگىندە بالالار COVID-19-بەن جىل باسىنداعىدان جيىرەك, بىلتىرعىدان الدەقايدا جيىرەك اۋىرىپ جاتىر. بىراق بالالاردىڭ 84 پايىزى اۋرۋدى جەڭىل, سيمپتومسىز فورمادا وتكەرىپ جاتقانىن ايتۋ كەرەك. ال 16 پايىزى ورتا اۋىر دارەجەدە وتكەرىپ جاتىر», دەدى كوميتەت باسشىسى.
ايناش ەسماعامبەتوۆا بالالار اراسىندا ۆيرۋس جۇقتىرۋدىڭ جيىلەۋى ەرەسەكتەردىڭ باياۋ ۆاكتسينا الىپ جاتقانىمەن تىكەلەي بايلانىستى ەكەنىن ايتتى.
«شىنىمەن دە ەرەسەكتەر بالالارعا قاجەت ۇجىمدىق يممۋنيتەت قالىپتاستىرا المادى دەپ ايتۋعا بولادى. ويتكەنى ۇجىمدىق يممۋنيتەتكە قاجەت 60 پايىزدىق ۇلەس قازاقستان حالقىنىڭ ەرەسەكتەرىنىڭ سانىمەن شامالاس. 18-گە تولماعان, ۆاكتسينا المايتىن بالالاردىڭ سانى شامامەن – 6 ملن. ياعني 60 پايىزدىق ۇجىمدىق يممۋنيتەت قالىپتاستىرىپ, بالالارىمىزدى قورعاۋ ءۇشىن بارلىق ەرەسەكتەر ەكپە الۋى كەرەك. ويتكەنى بالالار مەن جۇكتى ادامدارعا ەكپە الۋعا بولمايدى. وسى سانات ءبىز ءۇشىن تاۋەكەل توبى بولىپ وتىر. ەرەسەكتەر ۆاكتسينا الۋ ارقىلى ەكپە الۋعا بولمايتىن ادامداردى اۋرۋدان قورعاۋى كەرەك», دەدى سانيتارلىق-ەپيدەميولوگيالىق باقىلاۋ كوميتەتىنىڭ باسشىسى.