COVID-19 اۋرۋىنىڭ الدىن الۋ اياسىندا قازاقستاندا اتاۋلى الەۋمەتتىك كومەك الاتىن وتباسىلارعا مەديتسينالىق ءدارى-دارمەك قوبديشالارىن ۇسىنۋ بويىنشا اكتسيا باستالدى. بارلىعى 145 مىڭ جيىنتىق تەگىن تاراتىلادى, دەپ حابارلايدى Egemen.kz.
جيىنتىقتاردىڭ قۇرامىن قر دەنساۋلىق ساقتاۋ مينيسترلىگى ايقىندادى جانە وعان تەرمومەترلەر, ماسكالار, دەزينفەكتسيالىق قۇرالدار جانە ستەرويد ەمەس قابىنۋعا قارسى پرەپاراتتار كىرەدى.
الۋشىلارعا ءدارى-دارمەك قوبديشالارىن جەتكىزۋدى قالالىق نەمەسە اۋداندىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار بولىمدەرى جانە اۋىلدىق اكىمدىكتەر جۇزەگە اسىرادى.
بۇل شارا قيىن ماتەريالدىق جاعدايداعى وتباسىلاردىڭ ەكونوميكالىق اۋىرتپالىقتارىن ازايتۋعا مۇمكىندىك بەرەدى دەپ جوسپارلانۋدا.
«بۇل حالىقتىڭ ەڭ وسال توبىنا قولداۋ كورسەتۋگە باعىتتالعان ماڭىزدى ءارى قاجەتتى جوبا. ءبىز بۇل ءدارى-دارمەك قوبديشالارى ازاماتتارىمىز ءۇشىن COVID-19 اۋرۋىنىڭ الدىن الۋدا كومەك بولادى دەپ ۇمىتتەنەمىز», دەپ اتاپ ءوتتى قر ەڭبەك مينيسترلىگىنىڭ الەۋمەتتىك كومەك ساياساتىن دامىتۋ دەپارتامەنتى ديرەكتورىنىڭ ورىنباسارى عاليا جاباگينا.
ااك الۋشىلاردى مەديتسينالىق جيىنتىقتارمەن قامتاماسىز ەتۋ جونىندەگى جوبا ازيا دامۋ بانكىنىڭ قارجىلىق قولداۋىمەن ىسكە اسىرىلدى, بۇۇ دامۋ باعدارلاماسىنىڭ كەڭسەسى ساتىپ الۋ وپەراتورى بولىپ تابىلادى.
«الەمدەگى بىردە-ءبىر ۇيىم جانە بىردە-ءبىر ەل پاندەميانى جالعىز ءوزى جەڭە المايتىنى انىق بولدى. ادب بۇۇدب جانە دامۋ جونىندەگى باسقا دا سەرىكتەستەرمەن تىعىز ىنتىماقتاسا وتىرىپ, قازاقستان ۇكىمەتىنە پاندەمياعا قارسى كۇرەستە قولداۋ كورسەتۋدى جالعاستىرۋدا. وسى جوبا اياسىندا ءبىز ەڭ وسال وتباسىلاردى قولدايمىز, قازاقستانعا ۆيرۋستىڭ تارالۋىن تەجەۋگە جانە پاندەميانى جەڭۋگە كومەكتەسەمىز», دەدى ادب-نىڭ قازاقستانداعى وكىلدىگىنىڭ باسشىسى ناريمان مانناپبەكوۆ.
«ادب - مەن بىرلەسىپ, ۇلتتىق دەنساۋلىق ساقتاۋ جۇيەسىنىڭ توتەنشە جاعدايلارعا تۇراقتىلىعىن نىعايتۋعا كومەكتەسەمىز. بۇل جولى ءبىز دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنە ءدارى-دارمەكتەر مەن جەكە قورعانۋ قۇرالدارىن ساتىپ الۋعا قولداۋ كورسەتتىك», دەپ اتاپ ءوتتى بۇۇدب-نىڭ قازاقستانداعى تۇراقتى وكىلى ياكۋپ بەريش.