اباي اتىنداعى قازاق ۇلتتىق اكادەميالىق وپەرا جانە بالەت تەاترى 87-ماۋسىمىن «سپارتاك» قويىلىمىمەن جاپتى. ول اتالعان ونەر ورداسىندا العاش رەت 1974 جىلى ساحنالانعان بولاتىن, دەپ جازادى Egemen.kz.
اباي اتىنداعى قازاق ۇلتتىق اكادەميالىق وپەرا جانە بالەت تەاترى 87-ءشى تەاتر ماۋسىمىنىڭ اياقتالۋىنا وراي, كورەرمەن نازارىنا «سپارتاك» بالەتتىڭ جاڭارتىلعان نۇسقاسىن ۇسىندى. قويىلىمدى بالەتمەيستەر گۇلجان تۇتقىباەۆا, رەسەيدىڭ حالىق سۋرەتشىسى ۆياچەسلاۆ وكۋنەۆ قويدى. قويۋشى ديريجەرى - قازاقستاننىڭ ەڭبەك سىڭىرگەن قوعام قايراتكەرى ەربولات احمەدياروۆ.
پرەمەراعا بالەت ترۋپپاسىنىڭ بارلىق قۇرامى قاتىستى باستى پارتيالاردى جانەل تۇكەەۆا, ازامات اسقاروۆ, ارحات اشىربەك, ايمان ەگىسباەۆا, ماليكا ەلشىباەۆا, نەلسون پەنيا, گۇلۆيرا قۇربانوۆا, راحىم دايىروۆ سىندى جەتەكشى سوليستەر ورىندادى.
ەلۋ جىل بۇرىنعى پرەمەرادا كراسس ءرولىن سومداعان قازكسر ەڭبەك سىڭىرگەن ءارتىسى ەدۋارد مالبەكوۆ تە ارتىستەرگە كەڭەس بەرىپ, باعىت-باعدار كورسەتكەن. ول ءوز كەزەگىندە قويىلىمنىڭ تۋعان ساحناسىنا قايتا ورالعانىنا قۋانىشتى ەكەنىن ايتتى.
«ارينە, گۇلجان تۇتقىباەۆا مەن سۋرەتشى ۆياچەسلاۆ وكۋنەۆتىڭ وزگەرتۋلەرى ەنگىزىلدى. الايدا ول زاۋىربەك رايباەۆ قويعان سپەكتاكل كۇيىندە قالىپ وتىر. بارلىق بالەت ترۋپپاسى جوعارى ناتيجە كورسەتتى. وسى قويىلىم اياسىندا ەڭبەك ەتكەن بارلىق مامان ءوز مىندەتىن ءمىنسىز اتقارىپ شىقتى», دەدى ەدۋارد مالبەكوۆ.
ايتا كەتەيىك, قويىلىم ءۇشىن ارنايى 300-دەن استام كوستيۋم تىگىلگەن.