باتىس قازاقستان وبلىسىندا COVID-19 جۇقتىرۋ دەڭگەيى ازايدى. بۇل تۋرالى ءوڭىر اكىمى عالي ەسقاليەۆ ايتىپ بەردى, دەپ حابارلايدى Egemen.kz.
«وڭىردەگى ەپيدەميولوگيالىق جاعداي ءجىتى باقىلاۋدا. سوڭعى اپتادا 658 جۇقتىرۋ فاكتىسى انىقتالدى. الدىڭعى اپتامەن سالىستىرعاندا ناۋقاستار سانى 9%-عا ازايدى. وبلىستىڭ ەكى اي بويى قىزىل ايماقتا ورنالاسقانىن ەسكەرە وتىرىپ, اۋدان تۇرعىندارىنىڭ وبلىس ورتالىعىنا كەلۋىن ازايتۋ ءۇشىن 1 مامىردان باستاپ 14 كۇن بويى ورال قالاسى مەن قىزىل ايماقتا ورنالاسقان 6 اۋدان پەريمەترى بويىنشا بلوك بەكەتتەر ورناتىلدى», دەدى ع.ەسقاليەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
اكىمنىڭ ايتۋىنشا, بۇل شارالار وبلىس ورتالىعىنا تۇرعىندار اعىنىن 35%-عا ازايتۋعا جانە بۇقارالىق ءىس-شارالاردىڭ وتۋىنە جول بەرمەۋگە كومەكتەسكەن. ناتيجەسىندە, ءساۋىر ايىندا اۋرۋ كورسەتكىشى تاۋلىگىنە 200-250-دەن تىركەلسە, مامىر ايىندا – 90-100 جاعدايعا دەيىن تومەندەگەن.
«مونيتورينگ توپتارى 1 مامىردان باستاپ 179 رەيد جۇرگىزدى, 965 نىسان تەكسەرىلدى. جوعارىدا اتاپ وتكەنىمدەي, ەپيدەميانىڭ جاپپاي تارالۋىنا جول بەرمەۋ ءۇشىن ۇكىمەت بىرقاتار شارا قابىلدادى, سونىڭ ارقاسىندا جاعداي باقىلاۋدا ۇستاپ وتىرمىز», دەدى ع.ەسقاليەۆ.