الماتىداعى قارتتار ۇيىندە ەكى ەر ادام كوروناۆيرۋس جۇقتىرىپ قايتىس بولدى. تاعى ءبىر ايەل كىسى جۇقپالى اۋرۋلار ستاتسيونارىندا جاتىر, دەپ حابارلايدى Egemen.kz «شاڭىراق» الەۋمەتتىك قىزمەت ورتالىعىنا سىلتەمە جاساپ.
قايتىس بولعانداردىڭ ءبىرى 67 جاستا بولعان. مارقۇمنىڭ تۋىسى ولجاس حاميتوۆ مەكەمە قىزمەتكەرلەرىنىڭ سالعىرتتىعىنا نارازى, سەبەبى اعاسىنان كوروناۆيرۋستىڭ بەلگىلەرى انىقتالعان كەزدە بىردەن اۋرۋحاناعا جەتكىزبەگەن.
«سوڭعى رەت اناممەن سويلەسكەندە ول كىسى جوتەلىپ جاتتى. ءبىز نەلىكتەن دارىگەرگە قارالمايتىنىن سۇراعاندا, مەكەمە قىزمەتكەرلەرى دۇرىس قارامايتىنىن ايتتى. سوسىن 16 ساۋىردە اعام بىزگە حابارلاسىپ كوروناۆيرۋس جۇقتىرعانىن جەتكىزدى. 18 ساۋىردە ونىڭ قايتىس بولعانىن ەستىدىك.نەلىكتەن ولار ۋاقىتىندا ەمدەپ, پتر-تەست الماعان؟ بۇل قىزمەتكەرلەردىڭ سالعىرتتىعى, مەكەمەگە تەكسەرىس جۇرگىزۋ كەرەك», دەيدى مارقۇمنىڭ تۋىسى ولجاس حاميتوۆ.
الماتى قالالىق دەنساۋلىق باسقارماسىنىڭ وكىلى ەر ادام كوروناۆيرۋس جۇقتىرىپ اۋىر جاعدايدا اۋرۋحاناعا تۇسكەنىن ايتادى.
«شاڭىراق» ورتالىعىنىڭ ديرەكتورىنىڭ ورىنباسارى سىمبات نابيەۆانىڭ سوزىنشە, سەرىك حاميتوۆ راسىندا وتكەن جىلدىڭ قازان ايىنان بەرى قارتتار ۇيىندە تۇرىپ كەلگەن. سونداي-اق ەر ادامنىڭ كورناۆيرۋس جۇقتىرىپ, قايتىس بولعانىن دا راستادى. الايدا, مارقۇمنىڭ سوڭعى كۇندەرى قاتتى جوتەلگەنىن جوققا شىعاردى.
ەسكە سالا كەتەيىك, بۇعان دەيىن قارتتار ءۇيىنىڭ تاعى ءبىر تۇرعىنى كوروناۆيرۋس ينفەكتسياسىنان قايتىس بولعان ەدى. قازىرگى تاڭدا جۇقپالى اۋرۋلار ستاتسيونارىندا ينفەكتسيا جۇقتىرعان «شاڭىراق» ورتالىعىنىڭ تاعى ءبىر تۇرعىنى جاتىر.
گاۋحار قاپاش