بۇگىندە تاراز قالاسى قاۋىپتىلىك دەڭگەيىنىڭ «جاسىل» ايماعىنان «سارى» ايماعىنا ءوتتى. الايدا اۋرۋشاڭدىقتىڭ تۇراقتانۋ, تومەندەۋ ءۇردىسى بايقالمايدى. كوروناۆيرۋس ىندەتىن جۇقتىرۋ دەرەگى زەينەتكەرلەر ىشىندە كوپ تىركەلۋدە. بۇگىندە قالادا 440 قارت كىسى قاۋىپتى ىندەتتى جۇقتىرعان. جۇمىسسىزدار قاتارىندا 370 ادام بولسا, مەديتسينالىق قىزمەتكەرلەر سانى 50-ءدى قۇرايدى, دەپ حابارلايدى Egemen.kz.
تاراز قالاسى اكىمىنىڭ ورىنباسارى الماس سادۋباەۆتىڭ ايتۋىنشا, ىندەتتىڭ ورشۋىنە ادامداردىڭ توي-تومالاقتان تىيىلماي تۇرۋى دا سەبەپ بولۋدا. بۇگىندە تاراز قالاسىندا 74 مەيرامحانا مەن 220 كافە بار. ولاردىڭ باسىم بولىگى جۇمىس جاساپ تۇر دەسەك تە بولادى. تۇرعىنداردىڭ قوعامدىق ورىنداردا سانيتارلىق تالاپتاردى ساقتاماۋى دا قوعامعا قاۋىپتى ارەكەت بولىپ تۇر.
تارازدا جىل باسىنان بەرى كارانتين تالاپتارىن ساقتاماعاندارعا مونيتورينگ توبىنىڭ مۇشەلەرى 200-گە جۋىق حاتتاما تولتىرعان. ماسەلەن, قاڭتار ايىندا 34 حاتتاما, اقپان ايىندا 47 حاتتاما, ناۋرىز ايىندا 54 حاتتاما, ال ءساۋىر ايىنىڭ العاشقى ونكۇندىگىنىڭ وزىندە 50-گە جۋىق حاتتاما تولتىرىلعان.