الماتىداعى قورعانىس مينيسترلىگىنىڭ اسكەري كلينيكالىق گوسپيتالىندە COVID-19 تارالۋى جاعدايىندا مەديتسينا پەرسونالدارىن ارنايى تاكتيكالىق دايارلاۋ ساباعى ءوتتى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
اسكەري دارىگەرلەر ءىس-قيمىل ءتارتىبىن قاراپ, قاۋىپتى ينفەكتسيانىڭ بەلگىلەرى نەمەسە دياگنوزى قويىلعان كەزدە قىزمەتكەرلەرگە حابارلاۋ سىزباسىن پىسىقتادى.
جاپپاي كەلىپ ءتۇسىپ جاتقان ناۋقاستاردى العاشقى ءبولۋ جانە ورنالاستىرۋ ەرەجەلەرى, تەكسەرۋ ادىستەرى ەرەكشە نازارعا الىندى. بۇل ماسەلەلەر باسشىلىق, دارىگەرلەر, مەديتسينا پەرسونالدارىنىڭ پراكتيكالىق ساباعىنىڭ ءبىر بولىگى رەتىندە جان-جاقتى تالداندى.
ساباق بارىسىندا ينفەكتسيانىڭ تارالۋ قاۋىپسىزدىگىنىڭ ەرەجەلەرىن ساقتاۋ, جەكە قورعانىس قۇرالدارىن پايدالانۋ, جۇقتىرۋ ايماعىندا بولۋ جانە ول جەردەن شىققانداعى ماسەلەلەر ەگجەي-تەگجەيلى پىسىقتالدى.
وقۋ-جاتتىعۋعا قاتىسۋشىلار شۇعىل جاعدايدا جيناقى جانە جەدەل جۇمىس ىستەۋ, سانيتارلىق-ەپيدەميالىق نورمالاردى قامتاماسىز ەتۋ مەن ناۋقاستارعا ساپالى مەديتسينالىق كومەك بەرۋگە قاجەتتى كاسىپتىك دايارلىقتىڭ جوعارى دەڭگەيىن كورسەتتى.