نۇر-سۇلتاندا كوروناۆيرۋسقا قارسى ۆاكتسينا الۋعا جازىلۋ باستالدى

«ۆاكتسيناتسيا — لوكداۋندار مەن كارانتيندىك شەكتەۋلەر بولماعان كەزگە, ياعني قالىپتى ومىرگە ورالۋعا مۇمكىندىك بەرەتىن جالعىز ءتيىمدى ءادىس ەكەنىن ەسكەرە وتىرىپ, حالىق اراسىندا ۆاكتسيناتسيانى باستايمىز. ۆاكتسيناتسيا ادامداردىڭ ءبىر مەزگىلدە كوپ جينالۋىن بولدىرماۋ جانە قالا تۇرعىندارى ءۇشىن نەعۇرلىم قولايلى جاعداي جاساۋ ءۇشىن الدىن الا جازىلۋ ارقىلى جۇرگىزىلەدى. بۇل ۆاكتسينالاردى مەديتسينالىق مەكەمەلەر اراسىندا بىركەلكى بولۋگە مۇمكىندىك بەرەدى. جاسىنا بايلانىستى شەكتەۋلەر مەن مەديتسينالىق كورسەتكىشتەردى ەسكەرە وتىرىپ, 600 مىڭنان استام تۇرعىن ۆاكتسيناتسيالاۋعا جاتادى. تەك ءساۋىر ايىندا عانا دەنساۋلىق ساقتاۋ مينيسترلىگى (سك-فارماتسيا) 280 مىڭنان استام دوزا ۆاكتسينا جەتكىزۋدى جوسپارلاپ وتىر», دەپ جازدى اكىم.

ونىڭ ايتۋىنشا, ەگۋ پۋنكتەرىنىڭ سانى 36-دان 100-گە دەيىن كوبەيگەن. ۆاكتسيناتسيا پۋنكتەرىنىڭ جۇمىس ۋاقىتى ساعات 8:00-دەن 00:00-گە دەيىن ۇزارتىلدى.

«ۆاكتسينانى العىسى كەلەتىندەردىڭ ءبارى ءوتىنىش قالدىرا الادى. ەمحاناعا تىركەلۋ ورنى بويىنشا الدىن الا جازىلۋ كەرەك. دەنساۋلىق ساقتاۋ باسقارماسىنىڭ سايتىندا العاشقى مەديتسينالىق-سانيتارلىق كومەك ۇيىمدارىنىڭ بايلانىس نومىرلەرى, مەكەنجايلارى كورسەتىلگەن ءتىزىم جاريالاندى. ەكپە الۋعا جازىلۋ Damumed ءموبيلدى قوسىمشاسى ارقىلى دا جۇزەگە اسىرىلادى. قوسىمشادا پاتسيەنتتىڭ جەكە كابينەتى ارقىلى ۋچاسكەلىك دارىگەردىڭ قابىلداۋىنا جازىلۋ جانە ەسكەرتپەدە كۆي-عا قارسى ەكپە العىسى كەلەتىنىن كورسەتۋ جەتكىلىكتى», دەلىنگەن جازبادا.

سونداي-اق اپتانىڭ سوڭىنا دەيىن مەديتسينالىق مەكەمەلەر ۆاكتسيناتسياعا نيەت بىلدىرۋشىلەردى تىركەپ, اپتا سوڭىندا ۆاكتسيناتسيالاۋعا كىرىسەدى. دەنساۋلىق ساقتاۋ مينيسترلىگى جاقىندا "ەلەكتروندىق ۇكىمەت" پورتالىندا ۆاكتسيناتسيالاۋعا ەلىمىز بويىنشا ورتالىقتاندىرىلعان وتىنىمدەردى قابىلداۋدى ىسكە قوسادى. وندا "ۆاكتسيناتسياعا جازىلۋ" جەكە قويىندىسى بولادى.

«مەديتسينالىق مەكەمەلەر ەكپە العىسى كەلەتىن بارلىق تۇرعىنداردى قابىلداۋعا دايىن. دەگەنمەن Mega Silk Way سوو سياقتى بىرقاتار ساۋدا-ويىن-ساۋىق ورتالىعىنىڭ ينفراقۇرىلىمىن دايىندادىق. سونىمەن قاتار قالاداعى قوناقۇيلەر دە دايىن. قاجەت بولعان جاعدايدا, ۆاكتسيناتسيا پۋنكتتەرىن سول جەردە دە ورنالاستىرۋعا بولادى.

ءبىرىنشى كەزەڭدە ەكپەنى كوروناۆيرۋسپەن كۇرەستە الدىڭعى شەپتە جۇرگەن مەديتسينا قىزمەتكەرلەرى, مۇعالىمدەر, ءتارتىپ ساقشىلارى جانە ت. ب. الدى.

قازىر قالا تۇرعىندارى ەكپە الۋعا نيەت ءبىلدىرىپ جاتىر. بۇل ءبىزدى قۋانتادى, ويتكەنى حالىقتى ۆاكتسيناتسيالاۋ ۇجىمدىق يممۋنيتەتتى قالىپتاستىرۋعا جانە تۋىستارى مەن اينالاسىنداعى ادامداردى قورعاۋعا مۇمكىندىك بەرەدى. ەكپە العاندار ماسكا تاعىپ, سانيتارلىق نورمالاردى ساقتاۋ قاجەت», دەپ جازدى ەلوردا اكىمى.