ءساۋىر ايىندا قازاقستانعا كوروناۆيرۋسقا قارسى ۆاكتسينانىڭ 2 ملن دوزاسى جەتكىزىلەدى. بۇل تۋرالى بۇگىن ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي ايتتى, دەپ حابارلايدى Egemen.kz.
«1 اقپاننان بەرى كوروناۆيرۋسقا قارسى ۆاكتسيناتسيا ناۋقانى جالعاسىپ جاتىر. 1 ساۋىردەن باستاپ ۆاكتسيناتسيالاۋعا جاتاتىن تۇلعالار ساناتى كەڭەيتىلدى. كەستەنى جەرگىلىكتى اتقارۋشى ورگاندار ازىرلەيدى. بۇگىندە ءبىرىنشى كومپونەنت 197 706, ەكىنشى كومپونەنت 72 110 ازاماتقا سالىندى. رەسپۋبليكا بويىنشا 1 مىڭ تۇرعىنعا شاققانداعى كورسەتكىش 10,3-ءتى قۇرايدى. مەملەكەت باسشىسىنىڭ تاپسىرماسىمەن ساۋىردە ۆاكتسينانىڭ 2 ملن دوزاسى جەتكىزىلەدى. بۇل ۆاكتسينالاۋعا جاتاتىن تۇرعىنداردىڭ 23,4 پايىزىن قامتۋعا مۇمكىندىك بەرەدى», دەدى الەكسەي تسوي.
سونداي-اق مينيستر وڭىرلەرگە قانشا كولەمدە ۆاكتسينا جەتكىزىلەتىنىن ايتتى.
«وڭىرلەرگە ۆاكتسينا جەتكىزۋ كولەمى مەن الدىن الا مەرزىمى ايقىندالعان. قازىرگى ەپيدەميالىق احۋالدى ەسكەرە وتىرىپ, ساۋىردە ۆاكتسينا جەتىزۋ كولەمى نۇر-سۇلتان (284 مىڭ), الماتى (464 مىڭ), شىمكەنت (172 مىڭ) قالالارىنا, الماتى (232 مىڭ) جانە قاراعاندى وبلىستارىنا (217 مىڭ) ۇلعايتىلدى», دەدى ول.