نۇر-سۇلتان قالاسىنداعى «QAZAQSTAN» جاڭا جەڭىل اتلەتيكا كەشەنىندە جەڭىل اتلەتيكادان «Nur-Sultan Open 2021» اشىق چەمپيوناتى وتەدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
2021 جىلدىڭ 12-13 اقپانىندا اتالعان سپورت كەشەنىندە جاسى ۇلكەن جانە جاسى كىشى جاسوسپىرىمدەر اراسىندا جەڭىل اتلەتيكادان «Nur-Sultan Open 2021» اشىق چەمپيوناتىنىڭ جالاۋى جەلبىرەيدى. ءىس-شارانىڭ سالتاناتتى اشىلۋى 12 اقپان كۇنى ساعات 12:00-دە وتەدى.
اككرەديتتەۋ 11 اقپانعا دەيىن مىنا ەلەكتروندىق مەكەنجاي ارقىلى قابىلدانادى: sultan.nurekenovich@gmail.com.
بۇل چەمپيونات جاڭا كەشەن قابىرعاسىنداعى العاشقى سپورتتىق ءىس-شارا بولماق. جارىسقا قازاقستاننىڭ تۇكپىر-تۇكپىرىنەن 170-تەن استام سپورتشى قاتىسادى.
ايتا كەتەيىك, جاڭا كەشەن وتكەن جىلدىڭ قاراشا ايىندا اشىلعان بولاتىن. ول حالىقارالىق تالاپتاردىڭ بارىنە سايكەس كەلەدى جانە World Athletics سەرتيفيكاتىن العان. زاماناۋي جوعارى تەحنولوگيالارمەن جابدىقتالعان بازا سپورتشىلاردىڭ رەسپۋبليكالىق جانە حالىقارالىق جارىستارعا, الەم چەمپيوناتى مەن جازعى وليمپيادا ويىندارىنا دايىندالۋىنا مۇمكىندىك بەرەدى.