بىرنەشە كۇننەن بەرى ءبارىمىز NASA جاريالاعان جەردىڭ, ايدىڭ تاڭعاجايىپ سۋرەتتەرىنەن كوز الا الماي وتىرمىز. «مىناۋ ءبىزدىڭ ءۇيىمىز» دەپ ءوز پلانەتامىزدى سىرتىنان كورۋ ءسوزسىز تولقىتادى. سول ءبىر شاردىڭ ىشىندە ءبىزدىڭ دە جۇرەگىمىز سوعىپ تۇر. ءبىزدىڭ دە ءىزىمىز بار. «ادامعا تابىن, جەر, ەندى!» دەپ ولجاس (سۇلەيمەنوۆ) جىرلاعانداي, ءبىزدىڭ دە قيالىمىز سول عارىشكەرلەرمەن بىرگە ايعا ءبىر-اق ۇشتى.
«ارتەميدا-2» عارىش ميسسياسى بارىسىنداعى بۇل كادرلاردى استروناۆتار ايدىڭ ارعى بەتىن اينالىپ ۇشۋ كەزىندە تۇسىرگەن. ءبىر سۋرەتتە جەردىڭ اي كوكجيەگىنە باتىپ بارا جاتقان ءساتى بەينەلەنسە, ەكىنشىسىندە اي كۇندى تولىق جاۋىپ قالعان كەزدەگى كۇن تۇتىلۋى كورىنەدى. بۇل ەندى ءبىر عاجايىپ كورىنىس. جەردە مۇنداي تۇتىلۋدىڭ تولىق فازاسى بىرنەشە مينۋتقا عانا سوزىلسا, «وريون» ەكيپاجى ونى 57 مينۋت بويى باقىلاعان.
ەندى ءبىر كادردا جەر تولىعىمەن كوك جانە قوڭىر تۇسكە بويالعان. پوليار شۇعىلاسىنىڭ جاسىل ءتۇستى جارقىلى دا بايقالادى. NASA عالىمدارىنىڭ ايتۋىنشا, پلانەتا بوزعىلت كوك ءتۇستى, بۇلتتارمەن شاعىلىسقان جارىقتان پايدا بولعان نازىك كوگىلدىر شۇعىلا كورىنەدى.
ميسسيا قۇرامىنداعى ءتورت استروناۆت سەيسەنبىگە قاراعان ءتۇنى جەر سەرىگىن اينالىپ ءوتتى. ولار اي وربيتاسىندا جەتى ساعات بويى بولعان. وسى ۋاقىت ىشىندە «وريون» عارىش كەمەسى جەردەن رەكوردتىق قاشىقتىققا الىستاپ, 40 مينۋتقا دەيىن حيۋستونداعى باسقارۋ ورتالىعىمەن بايلانىسقا شىققان جوق. ولار ايدىڭ جەردەن كورىنبەيتىن ارعى بەتىن اينالىپ ءوتىپ, رەكوردتىق قاشىقتىققا جەتتى. بۇعان دەيىنگى رەكوردتى 1970 جىلى «اپوللون-13» ميسسياسى جاساعان ەدى.
بۇل جولى عارىش كەمەسى جەردەن 406 مىڭ شاقىرىمنان استام قاشىقتىققا دەيىن الىستادى. ۇشۋ كەزىندە «وريون» كەمەسى اي بەتىنە شامامەن 6 550 شاقىرىمعا دەيىن جاقىنداعان. كەمەدە ءتۇرلى كاسىبي كامەرا, سونداي-اق GoPro قۇرىلعىلارى ورناتىلىپ, بارلىق ءسات ۇزدىكسىز تۇسىرىلگەن. ميسسيا بارىسىندا جارىق ازايتىلىپ, يلليۋميناتورداعى شاعىلىسۋ تومەندەتىلگەن.
ەندى ەكيپاجدى اتموسفەراعا ەنىپ, مۇحيتقا قونۋ ماقساتى كۇتىپ تۇر. قونۋ 11 ءساۋىر كۇنى گرينۆيچ ۋاقىتىمەن 01:07-گە جوسپارلانعان.