الماتىدا 30 جىلدان بەرى پايدالانىلىپ كەلە جاتقان جىلۋ جەلىلەرىن جاڭارتۋ جۇمىستارىنا بايلانىستى رابيعا سىزدىق كوشەسىنىڭ ءبىر بولىگىندە قوزعالىس 2,5 ايعا شەكتەلەدى, دەپ حابارلايدى Egemen.kz
الداعى جىلىتۋ ماۋسىمىنا دايىندىق اياسىندا الماتىنىڭ اۋەزوۆ اۋدانىندا 1991 جىلى پايدالانۋعا بەرىلگەن ۇزىندىعى شامامەن 300 مەتر بولاتىن جىلۋ تراسساسىن جاڭارتۋ جۇمىستارى جۇرگىزىلەدى. بۇل تۋرالى «الماتى جىلۋ جەلىلەرى» جشس وكىلدەرى حابارلادى.
وسىعان بايلانىستى مامىر شاعىناۋدانىنداعى رابيعا سىزدىق كوشەسىندە اۆتوكولىك قوزعالىسىنا ۋاقىتشا شەكتەۋلەر ەنگىزىلەدى: 2026 جىلى 21 مامىر مەن 31 شىلدە ارالىعىندا — مامىر-2 شاعىناۋدانىنداعى №12 ۇيدەن باستاپ اۋلا اۋماعى ارقىلى مامىر-3 شاعىناۋدانىنداعى №25 ۇيگە دەيىنگى ارالىقتا; 2026 جىلى 26 مامىر مەن 31 شىلدە ارالىعىندا — باۋىرجان مومىش ۇلى كوشەسىنەن مامىر-1 شاعىناۋدانىنداعى №12 ۇيگە دەيىنگى ۋچاسكەدە. اتالعان كەزەڭدە كولىك قوزعالىسى ەكى باعىتتا دا شەكتەلەدى. بۇل جول استىنداعى قۇبىر جەلىلەرىن قايتا جاڭعىرتۋ جۇمىستارىن قاۋىپسىز جۇرگىزۋ ماقساتىندا قولعا الىنعان. قالا تۇرعىندارى مەن قوناقتارىنان ۋاقىتشا قولايسىزدىققا تۇسىنىستىكپەن قاراۋدى سۇرايمىز. قايتا جاڭارتۋ جۇمىستارى بارىسىندا تۇتىنۋشىلارعا ىستىق سۋ بەرۋ توقتاتىلمايدى.اتالعان جىلۋ جەلىسى 160 كوپقاباتتى تۇرعىن ءۇيدى, 3 بالاباقشانى, 5 مەكتەپتى, 1 دەنساۋلىق ساقتاۋ مەكەمەسىن جانە 26 وزگە دە نىساندى جىلۋ جانە ىستىق سۋمەن قامتاماسىز ەتەدى.