سىرتقى ىستەر مينيسترلىگى بەرلين قالاسىندا ۇستالعان قازاقستان ازاماتىنا قاتىستى پىكىر ءبىلدىردى. گەرمانيا بيلىگى ونى بارلاۋ قىزمەتىنە قاتىسى بولۋى مۇمكىن دەپ كۇدىكپەن ۇستاعان بولاتىن, دەپ حابارلايدى Egemen.kz.
سىرتقى ىستەر مينسترلىگىنىڭ رەسمي وكىلى ەرلان جەتىباەۆ گەرمانيانىڭ قۇزىرلى ورگاندارىنىڭ مالىمەتىنە سايكەس, قازاقستان ازاماتى 29 ءساۋىر كۇنى ۇستالعانىن راستادى.
«سىرتقى ىستەر مينيسترلىگى گەرمانيا فەدەراتيۆتىك رەسپۋبليكاسىنىڭ قۇزىرلى ورگاندارى ۇسىنعان اقپاراتقا سايكەس, 29 ساۋىردە قازاقستان ازاماتىنىڭ بارلاۋ قىزمەتىنە قاتىسى بولۋى مۇمكىن دەگەن كۇدىكپەن ۇستالعانىن راستايدى», دەدى ەرلان جەتىباەۆ.
مينيسترلىكتىڭ مالىمەتىنشە, ۇستالعان ازامات قازاقستاننىڭ ەلشىلىگىنە نەمەسە كونسۋلدىعىنا كومەك سۇراپ جۇگىنبەگەن. ۆەدومستۆو كونسۋلدىق جانە قۇقىقتىق كومەك كورسەتۋ ءۇشىن ازاماتتىڭ جەكە ءوتىنىشى قاجەت ەكەنىن اتاپ ءوتتى.
ەسكە سالا كەتەيىك, گەرمانيانىڭ قىلمىستىق پوليتسياسى ۇستاعان قازاقستان ازاماتى 2025 جىلدىڭ مامىر ايىنان باستاپ رەسەي بارلاۋىمەن بايلانىستا بولدى دەگەن كۇدىككە ىلىنگەن. الدىن الا مالىمەتتەر بويىنشا, ول گەرمانيانىڭ ۋكرايناعا اسكەري كومەگى, نەمىس قورعانىس ونەركاسىبى, اسىرەسە دروندار مەن روبوتتاردى ازىرلەۋشى كاسىپورىندار تۋرالى اقپارات بەرىپ كەلگەن.
بۇعان دەيىن تاياۋ شىعىستان ازاماتتاردى ەۆاكۋاتسيالاۋعا قانشا شىعىن كەتكەندىگىن جازعان ەدىك.