قازاقستاندا قارىز الۋشىلاردىڭ بورىشتىق جۇكتەمەسىنە باقىلاۋ كۇشەيتىلمەك. ۇلتتىق بانك 2027 جىلدىڭ 1 قاڭتارىنان باستاپ قارىز الۋشىنىڭ كىرىسىنە قاتىستى بورىش كوەففيتسيەنتىنىڭ (كبك) شەكتى دەڭگەيىن ەنگىزۋدى جوسپارلاپ وتىر, دەپ حابارلايدى Egemen.kz.
بۇل وزگەرىستەر ۇلتتىق بانك ازىرلەگەن ماكروپرۋدەنتسيالىق نورماتيۆتەر مەن ليميتتەر تۋرالى قاۋلى جوباسى اياسىندا قاراستىرىلعان.
كبك كورسەتكىشى 2024 جىلدىڭ تامىز ايىنان باستاپ مونيتورينگتىك رەجيمدە قولدانىلىپ كەلەدى. ول ازاماتتىڭ بارلىق وتەلمەگەن نەسيەلەرى مەن ميكروكرەديتتەرى, سونداي-اق جاڭا قارىزدى قوسقانداعى جالپى بەرەشەگىنىڭ ونىڭ جىلدىق تابىسىنا قاتىناسىن كورسەتەدى.
قاراپايىم تىلمەن ايتقاندا, بۇل كوەففيتسيەنت ادامنىڭ قارىزى ونىڭ ءبىر جىلدىق تابىسىنان قانشالىقتى اسىپ كەتكەنىن انىقتاۋعا مۇمكىندىك بەرەدى. كورسەتكىش جوعارىلاعان سايىن قارىز جۇكتەمەسى ارتىپ, تولەم قابىلەتىنە قاۋىپ كوبەيەدى.
ەندى بانكتەر يپوتەكا بەرۋدە قارىز الۋشىنىڭ تولەم قابىلەتىن قاتاڭ تەكسەرەدى
ۇلتتىق بانك كبك-نىڭ شەكتى دەڭگەيىن قارىز الۋشىنىڭ جىلدىق تابىسىنىڭ 8 ەسەسى كولەمىندە بەلگىلەۋدى ۇسىنىپ وتىر. ياعني ازاماتتىڭ جالپى قارىزى ونىڭ ءبىر جىلدىق كىرىسىنەن سەگىز ەسە كوپ بولماۋى ءتيىس.
رەتتەۋشى ورگاننىڭ مالىمەتىنشە, بۇل شارا بانكتەردىڭ جاۋاپتى نەسيە ساياساتىن كۇشەيتۋگە, حالىقتىڭ شامادان تىس قارىزعا باتۋ تاۋەكەلىن ازايتۋعا جانە قارجى جۇيەسىنىڭ تۇراقتىلىعىن قامتاماسىز ەتۋگە باعىتتالعان.
2027 جىلدان باستاپ ازاماتتاردىڭ قارىز كولەمىنە شەكتەۋ ەنگىزىلۋى مۇمكىن
سونىمەن قاتار اۆتونەسيە, يپوتەكا جانە كەپىلسىز تۇتىنۋشىلىق قارىزدار بويىنشا كبك كورسەتكىشىنە مونيتورينگ جالعاسادى. الايدا ازىرگە بۇل نەسيە تۇرلەرىنە جەكە شەكتى ماندەر ەنگىزۋ جوسپارلانباعان.
ۇلتتىق بانك قاجەت بولعان جاعدايدا قارىز تۇرلەرىنە قاراي سارالانعان شەكتەۋلەر بەلگىلەۋگە نەمەسە كبك دەڭگەيىن قايتا قاراۋعا قۇقىلى ەكەنىن اتاپ ءوتتى.
بۇعان دەيىن ەلىمىزدە ازاماتتاردىڭ 250 ملرد قارىزى كەشىرىلەتىنىن حابارلاعان ەدىك.