كاسىپتىك وقىتۋ پلاتفورماسىنا سۇرانىس

تەك بيىلعى ءۇش ايدىڭ وزىندە 56,8 مىڭ ازامات كاسىپتىك وقىتۋ پلاتفورماسىنا جازىلعان. پلاتفورما ىسكە قوسىلعالى 1 ملن 200 مىڭ ادام وقۋدان ءوتتى. وقۋدى اياقتاعان 16,7 مىڭ جۇمىسسىز ازاماتتىڭ ىشىندە 16–35 جاس ارالىعىنداعى جاستاردىڭ ۇلەسى باسىم. اتاپ ايتقاندا, شىمكەنت قالاسىنان – 2 172, اقتوبە وبلىسىنان – 2 125, تۇركىستان وبلىسىنان – 1 446, قىزىلوردا وبلىسىنان – 1 342, قوستاناي وبلىسىنان – 1 304 ادام.

پلاتفورمادا اۆتورلاردىڭ ءارتۇرلى باعىت­تى قامتيتىن 581 كۋرسى جاريالانعان, ونىڭ 395-ءى تەگىن. سونداي-اق ودان ءارى وقۋدى جالعاستىرعىسى كەلەتىندەرگە ءبىلىم بەرۋ الاڭ­دارىنا اۋىسۋ مۇمكىندىگىن ۇسىناتىن «Fluent Education» مەن «ياندەكس قازاقستان» سەرىكتەستەرىنىڭ كۋرستارى بار. كۋرستاردىڭ ۇزاقتىعى – 2–72 ساعات.

پلاتفورمادا الەۋمەتتىك قىزمەت كورسەتۋمەن بىرگە وزگە سالالارداعى ءتۇرلى ماماندىققا باۋليتىن تەگىن كۋرستار سانى ۇنەمى ارتىپ كەلەدى. ونلاين وقىتۋ پلاتفورماسى حالىقتىڭ ءبىلىم دەڭگەيى مەن كاسىبيلىگىن ارتتىرۋعا, مانساپتىق دامۋدى ىنتالاندىرىپ, ء«ومىر بويى وقىتۋ» تۇجىرىمداماسىن ىلگەرىلەتۋگە باعىتتالعان. ءبىلىم الۋشى وقىتۋدىڭ قولايلى ءتاسىلى مەن ءتىلىن, ماتەريالدى بەرۋدىڭ ىڭعايلى ءپرينتسيپىن ءوزى تاڭداپ, ءبىلىم ۇدەرىسىندە قابىلەت-قارىمىن باقىلاي الادى. وقۋ اياقتالعاننان كەيىن ءبىلىم الۋشى 70%-دىق شەكتى دەڭگەيمەن تەستىلەۋدەن وتەدى. ونلاين كۋرستى ءساتتى اياقتاعاندارعا داعدىلاردى يگەرۋى تۋرالى سەرتيفيكات بەرىلەدى. سەرتيفيكاتتى جۇكتەۋ كەزىندە يگەرگەن ماماندىعىنا ساي Enbek.kz-تە بوس جۇمىس ورىندارىن ۇسىنۋ فۋنكتسياسى ىسكە قوسىلادى. سەرتيفيكات Enbek.kz-تە تىركەلگەن كەزدە ءبىلىم الۋشىنىڭ تۇيىندەمەسىندە اۆتوماتتى تۇردە كورسەتىلەدى. قىزمەتكەرلەردى ىزدەۋ كەزىندە الەۋەتتى جۇمىس بەرۋشى پلاتفورمادا وقۋدى ءساتتى اياقتاعان سەرتيفيكات يەلەرىن كورە الادى.

پلاتفورمادا ونلاين كۋرستاردى اۆتورلار مەن ازىر­لەۋشىلەر تەگىن ورنالاستىرادى. كۋرستاردى مەملەكەتتىك, ورىس, اعىلشىن تىلدە­رىندە جۇكتەۋگە بولادى. اقپارات ءارتۇرلى فورماتتا: ءماتىن, تانىستىرىلىم, بەينە, اۋديو ماتەريالدار, ينفوگرافيكا, باسقا دا ادىستەرمەن بەرىلۋگە ءتيىس. كۋرس اۆتورلارىنا دا پلاتفورما ءتيىمدى. سەبەبى ىڭعايلى ساباق قۇراستىرۋ, جاريالانعان كۋرستاردىڭ ستاتيستيكاسى مەن تيىمدىلىگىن قاراۋ, سەرتيفيكاتتاردى ءتۇرلى ديزايندا جاساۋ, سونداي-اق وقۋ قۇنىن الدىن الا ەسەپتەۋگە ارنالعان ونلاين-كالكۋلياتوردى قولدانۋ مۇمكىندىگى بار.