سپورت پەن شارۋاشىلىقتى قاتار يگەرىپ, جىبەك باۋلى التىن قازىعىن اۋىلعا قاعىپ, ءورىسىن قالادان تاپقان جۇلدىز – جاڭا زاماننىڭ جاسى. ءتورت ت ۇلىكتىڭ پايداسىن ءتۇسىنىپ, بابىن تابۋ – كەز كەلگەنگە بۇيداسىن ۇستاتپايتىن تىرلىك. ال ءار تاڭىن تۇيە ساۋدان باستايتىن جۇلدىز ءۇشىن مال شارۋاشىلىعى – ءومىرىنىڭ وزەگى.
2005 جىلى قاڭتار ايىندا بەكى اۋىلىندا تۋعان جۇلدىز وتەپبەرگەن دزيۋدو شەبەرى, ەل چەمپيونى. دزيۋدومەن 6-سىنىپتان باستاپ اينالىسقان ول اقتاۋداعى «اسمەت ۇلاس» جوعارى پەداگوگيكالىق كوللەدجىن دەنە شىنىقتىرۋ ماماندىعى بويىنشا تامامداعان. قازىرگى تاڭدا جالىنداعان جاس – اقتاۋداعى «TAIQOT» سپورت كلۋبىندا باپكەر. جاس باپكەر ءار شاكىرتىنىڭ بولاشاعىنا ۇمىتپەن قارايدى ءارى سپورتشى رەتىندە ءوزى دە الەم چەمپيونى تۇعىرىنا كوتەرىلۋدى ارماندايدى.
وتباسىندا ءبىر اپكە, ءبىر ءىنى, ەكى ءسىڭلىسى بار جۇلدىز قالاداعى جاتتىعۋدان قولى بوساي سالا, بەكىگە قاراي جول تارتادى. مۇندا ونى ءتورت ت ۇلىكتىڭ جاعدايىن جاساۋ دەيتىن ءحوببيى كۇتىپ تۇرادى. موتوتسيكل مەن كولىك جۇرگىزەتىن شارۋا قىزعا اتقا ءمىنۋ دە اسا قيىندىق تۋعىزعان ەمەس. ساۋمال ساۋىپ, مالدى ورىسكە جىبەرۋ, اۋىلدا قالعان بوتالاردىڭ بابىن جاساۋ, قورا تازالاۋ, كەشكى ورىستەن كەلەر ءتورت ت ۇلىگىن تۇگەندەپ اۋىلعا اكەلۋ, قورالاۋ سىندى جۇمىس – مال شارۋاشىلىعىن كاسىپ ەتكەن جۇلدىزعا قيىن ەمەس, قىزىق ءىس. دالا قىزىنىڭ شارۋادان تىنىسى كەڭەيىپ, جانى تىنىشتىق تابادى.
«اۋىلداعى ەڭبەك ادامدى شىدامدىلىق, جاۋاپكەرشىلىك پەن تاباندىلىققا تاربيەلەيدى» دەپ سانايتىن جۇلدىز ساۋالبەكقىزى: «مۇنداعى ءومىر ماعان ەڭ الدىمەن – تىنىشتىق. اۋىلدىڭ تازا تابيعاتىنان ەنەرگيا الامىن, ال مال باپتاۋ, ءتورت ت ۇلىكتى جايعاۋ سەكىلدى جۇمىس كۇش بەرەدى, ويدى تازارتادى. تاڭعى اس ىشپەستەن بۇرىن تۇيە ساۋامىن, سەبەبى ءۇيىمنىڭ بەرەكەسىن ارتتىرعان ءتورت ت ۇلىگىم – مەن ءۇشىن ءبىرىنشى ورىندا», دەيدى.
سپورتزالدا شاكىرتتەرىمەن بىرگە جاتتىعىپ, اۋىلدا اتا-اناسىنىڭ كومەكشىسى بولعان قىز الەۋمەتتىك جەلىدە دە بەلسەندى. Instagram, TikTok جەلىلەرىندە اۋىلدىڭ تىنىس-تىرشىلىگى, مالدى كۇتىپ-باپتاۋ, جايۋ, كولىك جۇرگىزۋ, مال ونىمدەرىن دايىنداۋ باعىتىندا اسەرلى جازبالارى مەن تۇسىرىلىمدەرىن ءجيى جاريالاپ, جۇرتشىلىقتىڭ ىستىق ىقىلاسىنا بولەنىپ ءجۇر.
كوكتەم – تابيعاتتىڭ قايتا تۇلەپ, ءتورت ت ۇلىكتىڭ تولدەپ, قورانىڭ قوزى-لاق پەن بوتا-بۇزاۋعا تولاتىن كەزى. مال شارۋاشىلىعىنىڭ ماشاقاتى قاي مەزگىلدە دە از ەمەس, ايتسە دە كوكتەمنىڭ مالشىلارعا قات-قابات توساتىن قيىندىعى تاعى بار. وسى قيىندىقتىڭ ءوزىن قىزىقتى ءارى تارتىمدى كونتەنتكە اينالدىرۋ جۇلدىزدىڭ قولىنان كەلدى. شارۋانى دوڭگەلەنتە ءجۇرىپ, تارتىمدى ءساتتى ادەمى كادرمەن جەلىگە جۇكتەپ, وقىرمانىن قۋانتۋعا دا ۋاقىت تاپتى.
– اۋىل ءومىرى – جان-جاقتى قالىپتاسۋدىڭ باستاۋى. ونى جەلىگە جۇكتەۋدەگى ماقساتىم – اۋىل تۇرمىسىنىڭ مازمۇندى ءارى قىزىقتى ەكەنىن كورسەتۋ. مۇنداعى ءار كۇن جاڭا تاجىريبە مەن ەڭبەككە تولى, – دەيدى ول.
ارمانى اسقاق, ماقساتى مول جاس بولاشاقتا اۋىل تۇرمىسى, مال شارۋاشىلىعىنا قاتىستى ەتنوتۋريزمدى دامىتىپ, جەكە كاسىپپەن اينالىسقىسى كەلەدى. بولاشاعىن تۋريزم سالاسىمەن بايلانىستىرعان ماڭعىستاۋ وڭىرىندە بۇل قاجەتتى ءارى ۇتىمدى جوبا بولارى انىق.
«ىنىلەرىمىز بار ەدى, ءوزىڭ سياقتى شارۋانىڭ جايىن بىلەتىن قىز بولسا جاقسى عوي», دەدىم اڭگىمە سوڭىن ازىلگە بۇرىپ. «جەلىگە اۋىل ءومىرىن سالامىن دەپ وسىنداي ۇسىنىستان باس كوتەرە الماي قالدىم», دەپ ءسال جىميعان جۇلدىز ىشكى سىرىنىڭ شەتىنەن جايلاپ حابار بەرىپ قۇتىلدى. ال ءبىز ىشتەي ۇلتتىق بولمىسىمىزدى زاماناۋي جاڭعىرتىپ قانا قويماي, العا جەتەلەيتىن جۇلدىزداي قازاقى قۇندىلىققا قانىپ وسكەن جاستارىمىز كوپ بولسىن دەپ تىلەدىك.
ماڭعىستاۋ وبلىسى