استانا قالاسىندا كونستيتۋتسيا كوشەسى بويىنداعى «يلياس» دۇكەنى ماڭىندا جاس جىگىتتىڭ سوققىعا جىعىلعانى بەلگىلى بولدى. زارداپ شەگۋشىنىڭ تۋىستارىنىڭ ايتۋىنشا, وقيعاعا شامامەن 40-قا جۋىق ادامنىڭ قاتىسى بولۋى مۇمكىن, دەپ حابارلايدى Egemen.kz.
جانجال سالدارىنان ءجاسوسپىرىمنىڭ مۇرنى سىنعان, سونداي-اق ءبىر ءتىسى زاقىمدانىپ, ءتۇسىپ قالعان.
استانا قالالىق پوليتسيا دەپارتامەنتىنىڭ مالىمەتىنشە, اتالعان دەرەك بويىنشا دەنساۋلىققا قاساقانا اۋىر زيان كەلتىرۋ بابىمەن قىلمىستىق ءىس قوزعالعان. وقيعاعا قاتىسى بار تۇلعالار انىقتالىپ, سارىارقا اۋداندىق پوليتسيا باسقارماسىنا جەتكىزىلگەن.
ۆەدومستۆونىڭ حابارلاۋىنشا, جانجال تۇرعىن ءۇي اۋلاسىندا جاستار اراسىندا تۋىنداعان. جاراقات العان كامەلەتكە تولماعان ازاماتقا مەديتسينالىق كومەك كورسەتىلىپ, دارىگەرلىك تەكسەرۋدەن كەيىن ۇيىنە جىبەرىلگەن.
استانادا ەر ادام جۇبايىن كوپشىلىك كوزىنشە سوققىعا جىققان
قازىرگى ۋاقىتتا وقيعانىڭ بارلىق ءمان-جايىن انىقتاۋ ءۇشىن تەرگەۋ امالدارى جۇرگىزىلىپ جاتىر.
ايتا كەتەيىك, بۇعان دەيىن الماتى قالاسىندا جاپپاي توبەلەس كەزىندە ەكى ءجاسوسپىرىم قازا تاپقان بولاتىن.