ۇلتتىق مۋزەيدە سۋرەتشى اڭساعان مۇستافانىڭ «سويلە, سۋرەت» اتتى جەكە كورمەسى كوپشىلىك نازارىنا ۇسىنىلدى. بۇل كورمە سۋرەتشىنىڭ شىعارماشىلىق جولىنداعى 200-ءشى مەرەيتويلىق ەكسپوزيتسياسى, دەپ حابارلايدى Egemen.kz.
كورمەنىڭ اشىلۋىندا ءسوز سويلەگەن ۇلتتىق مۋزەي ديرەكتورى بەرىك ابدىعالي ۇلى بۇعان دەيىن مۋزەي قابىرعاسىندا كوپتەگەن حالىقارالىق دەڭگەيدەگى كورمە وتكەنىن اتاپ ءوتىپ, بۇل جوبا دا كورەرمەننىڭ جوعارى قىزىعۋشىلىعىنا يە بولاتىنىنا سەنىم ءبىلدىردى.
«اڭساعان مۇستافانىڭ تۋىندىلارى ادامدى ويلانۋعا, قوعامداعى وزگەرىستەرگە تەرەڭىرەك ۇڭىلۋگە جەتەلەيدى. ۇلتتىق مۋزەي مۇنداي شىعارماشىلىق باستامالاردى ۇنەمى قولداپ, قوعامداعى وزەكتى ماسەلەلەردى ونەر ارقىلى كوتەرۋگە مۇمكىندىك بەرىپ كەلەدى», دەدى ول.
كورمە ەكسپوزيتسياسىنا اۆتوردىڭ زاماناۋي قوعامداعى ماڭىزدى الەۋمەتتىك تاقىرىپتاردى ارقاۋ ەتكەن 70-كە جۋىق گرافيكالىق جۇمىسى قويىلعان.
سۋرەتشى ءوز ەڭبەكتەرىندە الەۋمەتتىك جەلى داۋىرىندەگى جالعىزدىق, تەحنولوگياعا تاۋەلدىلىك, ادامدار اراسىنداعى قارىم-قاتىناس, وتباسى قۇندىلىقتارىنىڭ السىرەۋى, جۇمىسسىزدىق, قارجىلىق قيىندىقتار مەن تسيفرلىق تاۋەلدىلىك سياقتى وزەكتى ماسەلەلەردى كوركەم تىلمەن بەينەلەيدى.
سۋرەتشىنىڭ ايتۋىنشا قوعامداعى اتالعان ماسەلەلەر تەك جەرگىلىكتى ەمەس, جاھاندىق سيپات الىپ وتىر.
سونداي-اق ءماجىلىس دەپۋتاتى داۋلەت كارىبەك كورمەنىڭ مازمۇنىنا توقتالىپ, الەۋمەتتىك جەلىنىڭ ادامنىڭ ويلاۋ جۇيەسىنە اسەرى تۋرالى پىكىر ءبىلدىردى. ونىڭ ايتۋىنشا, ادام تۇتىناتىن اقپارات ونىڭ دۇنيەتانىمىنا تىكەلەي ىقپال ەتەدى, سوندىقتان اقپاراتتىق كەڭىستىكتى تاڭداۋدا ساق بولۋ ماڭىزدى.
«اڭساعان مۇستافانىڭ شىعارماشىلىعى – بۇگىنگى قوعامنىڭ ايناسى ىسپەتتى. بۇل تۋىندىلار ءار كورەرمەندى ويلاندىرىپ, ءوز تاڭداۋىنا سىن كوزبەن قاراۋعا جەتەلەيدى», دەدى ول.
2014 جىلى استانادا باستاۋ العان «سويلە, سۋرەت» جوباسى كەيىن قازاقستاننىڭ بارلىق وڭىرىندە تانىستىرىلىپ, شەتەلدەردە دە جالعاسىن تاپقان. بۇگىندە سۋرەتشىنىڭ ەڭبەكتەرى الەمنىڭ 30-دان استام ەلىندە كورەرمەنگە ۇسىنىلعان.
كورمە ۇلتتىق مۋزەيدىڭ 6-قاباتىندا 2026 جىلعى 19 مامىرعا دەيىن كەلۋشىلەرگە اشىق بولادى.