قوعامعا وي سالعان قولتاڭبا

الەۋمەتتىك جەلىنى بەلسەندى پايدالاناتىن ورتاعا اڭساعان مۇستافا ەسىمى جاقسى تانىس. ونىڭ العاشقى سۋرەتتەرى الدىمەن الەۋمەتتىك جەلىلەردە جاريا­لاندى. قازىرگى قوعام دەرتىن ءدوپ باسىپ, اينالادا بولىپ جاتقان تۇرمىس تۇيتكىلدەرىن بۇكپەسىز جەتكىزگەن شىنايى تۋىندىلار بىردەن جۇرتشىلىق نازارىن اۋدارىپ, ەل اراسىنا كەڭىنەن تارالدى.

ەلىمىزدىڭ ءىرى قالالارىندا اڭساعاننىڭ تەرەڭ سىرعا تولى سۋرەتتەرى كوپشىلىككە وي تاستاۋ ماقساتىندا ءىلىنىپ تۇر. كوپشىلىكتىڭ كوكەيىندەگىسىن دالمە-ءدال سۋرەتتەگەن «اكە, بالاڭا كوڭىل ءبول!», «انا, تەمەكى تارتپا!», «قارتتار ۇيىندە قازاق كوپ», «قورقام, اكە, ۇرماشى...», «تازالىق», «ارى بارىپ وينا!», «ۇرىس تەك بالاعا زيان», «ۇيادا نە كورسەڭ, ۇشقاندا سونى ىلەرسىڭ» سىندى كوپتەگەن الەۋمەتتىك يلليۋستراتسيا لەگىن كورمەگەن ادام كەمدە-كەم بولار.

اڭساعان اتىراۋ وبلىسىنىڭ ميالى اۋىلىندا دۇنيەگە كەلگەن. الماتى قالاسىنداعى كوركەمسۋرەت كوللەدجىن تامامداعان ول كەيىن ت.جۇرگەنوۆ اتىنداعى قازاق ۇلتتىق ونەر اكادەمياسىندا گرافيكالىق ديزاين ماماندىعىن مەڭگەردى. «بەينەلەۋ ونەرىنە بەت بۇرۋىما جازۋشى اكەم مەن جۋرناليست انام ىقپال ەتتى دەۋگە بولادى. بالا كەزىمدە انام شولپان ۇعىبايقىزى «اق بوساعا» اتتى گازەت شىعاردى. مەنى ىلعي جانىنا ەرتىپ جۇرەتىن. رەداكتسيادا جۋرناليست اعا-اپكەلەردىڭ اڭگىمەسىن تىڭداپ, سونىڭ جەلىسىمەن سۋرەت سالاتىنمىن. كەيىن بۇل ادەتىم شىنايى ونەرگە ۇلاستى. العاشقى سۋرەتتەرىمدى الەۋمەتتىك جەلىلەرگە جۇكتەدىم. وندا دا قالامگەرلەر, جۋرناليستەر ءارتۇرلى يدەيالارىن ۇسىنىپ, ءتۇرلى الەۋمەتتىك تاقىرىپقا قالام تارتۋىما تۇرتكى بولدى» دەيدى ونەر يەسى.

بولمىسى بولەك, ويى استارلى سۋرەتشىنىڭ قىلقالامىنان تۋعان دۇنيەلەردى ءۇش توپقا جىكتەۋگە بولادى: انا مەن بالا, تەلەفونعا تەلمىرگەن ۇرپاق, ماڭگى ماحاببات تاقىرىبىنا ارقاۋ بولعان سان قيلى تاعدىر.

ونىڭ قاي سۋرەتىن الساڭىز دا زامان تىنىسىن, زامانداس كەلبەتىن كورەسىز. ۋاقىت اعىمىنا ساي وزگەرگەن ادام پسيحولوگياسىنداعى ەرەكشەلىكتى اينىتپاي بەينەلەن­گە­نىنە كۋا بولاسىز. قازىرگى قوعام­نىڭ تارام-تارام مىنەزىن تاپ باسۋ, يدەيانى الەۋمەتتىڭ وزىنەن ىزدەۋ, ونى بويا­ماسىز كۇيدە كوپشىلىككە جەتكىزە ءبىلۋ – سۋرەت­شى­نىڭ باس­تى ەرەكشەلىگى بولسا كەرەك. جۇرت­شىلىق اڭساعاننىڭ شىنايى شى­عار­ما­لا­رىن جىلى قابىل­داي­تى­نى دا سوندىقتان.

ا.قۇرمانعازىقىزىنىڭ شى­عار­ماشى­لىعىنا ورالۋى­مىزدىڭ وزىندىك سەبەبى بار. 17 ءساۋىر كۇنى استاناداعى ۇلتتىق مۋزەيدە قىلقالام يەسىنىڭ «سويلە, سۋرەت!» اتتى الەۋمەتتىك تاقىرىپتارعا ارنالعان كورمەسى وتەدى. بۇل رۋحاني ءىس-شارا اڭساعاننىڭ شىعارماشىلىعىنداعى ما­ڭىزدى بەلەس دەۋگە بولا­دى. 2014 جىلدان باستاۋ العان كورمە ەلىمىزدىڭ بارلىق قالا­سىن ارالاپ, كەيىن شەت مەم­لەكەتتەردە جالعاسىن تاپتى. وسى­لاي­شا, سۋرەتشىنىڭ تاڭداۋلى تۋىن­دىلارى الەمنىڭ 30-دان استام ەلىن ارالاپ, ونەرسۇيەر قاۋىمنىڭ ىقىلاسىنا يە بولدى.

ال ەلورداداعى كورمە – وسى شىعارماشىلىق ساپاردىڭ  جال­عا­سى ىسپەتتى. بۇل – سۋرەتشىنىڭ 200-كورمەسى ەكەن. مۇندا اۆتور­دىڭ كەڭىنەن تانىلعان دارا شى­عار­­مالارى قويىلادى. ءبىر ادام­نىڭ ەمەس, تۇتاس قوعامنىڭ بەت-بەينەسىن كورسەتۋگە تىرىسقان سۋرەتشىنىڭ كورمەسىندە اتا-انا مەن بالا اراسىنداعى قارىم-قاتىناستىڭ وسال تۇستارى, قيلى تاعدىرلار توعىسى, كۇي­بەڭ تىرشىلىك تۇيتكىلدەرى مەن تەح­نو­لوگياعا تاۋەلدىلىك تاقىرىپ­تا­رى ايشىقتالماق. «ەلوردالىق كورەرمەنگە ءوزىمنىڭ ەڭ كەڭ تارالعان تۋىندىلارىمدى ۇسىنباقشىمىن. ءاربىر سۋرەتىمنىڭ ايتارى بار. ءبارى دە كۇندەلىكتى ومىردەن الىنعان كو­رىنىستەر. جالپى, مەن قازاق قو­عا­مىنىڭ – ۇرەيسىز, ءار ادامنىڭ ج­ۇ­رەگى ۋايىمسىز بولعانىن قا­لاي­مىن. تۋىندىلارىم ارقىلى كوكەيىمدە جۇرگەن وسى ارمان-ماق­سا­تىمدى جەتكىزگىم كەلدى», دەيدى سۋرەتشى.

ونەردىڭ ميسسياسى – رۋحاني اسەمدىك سىيلاۋ عانا ەمەس, كورگەن ادامعا وي سالۋ. ەندەشە, سۋرەتشى-يلليۋستراتور اڭساعان مۇستافانىڭ باس شاھارداعى كورمەسى كوپشىلىكتى ءوز ومىرىنە, اينالاسىنا سىن كوز­بەن قاراۋعا, كەم-كەتىكتىڭ ورنىن تولتىرۋعا ۇندەيتىن, جاقسى وزگە­رىس­كە جەتەلەيتىن تاعىلىمى مول شىعارماشىلىق كەش بولاتىنىنا سەنىم مول.