ءىىم سۇرانىسقا يە مەملەكەتتىك قىزمەتتەردى اتادى

ونىڭ ىشىندە 8,5 ملن-نان استام قىزمەتتى ازاماتتار egov.kz پورتالى ارقىلى, سونداي-اق حالىققا قىزمەت كورسەتۋ ورتالىقتارىندا ەلەكتروندى تۇردە الدى, تەك پوليتسيا بولىمشەلەرىنە جۇگىنگەن كەزدە عانا 387,5 مىڭ قىزمەت قاعاز تۇرىندە كورسەتىلگەن. وسىنىڭ ىشىندە اۆتوكولىكتى تىركەۋ (2 ملن 366 مىڭ), جەكە باستى كۋالاندىراتىن قۇجاتتاردى بەرۋ (2 ملن 253 مىڭ) جانە جۇرگىزۋشى كۋالىكتەرىن بەرۋ (986 مىڭ), سونداي-اق ازاماتتاردى تۇرعىلىقتى جەرى بويىنشا تىركەۋ (2 ملن 067 مىڭ) ەڭ كوپ سۇرانىسقا يە قىزمەتتەر بولىپ سانالادى.

ۆەدومستۆو اتاپ وتكەندەي, تسيفرلاندىرۋ جۇمىس تيىمدىلىگىن ارتتىرادى, پروتسەستەردى جەڭىلدەتەدى جانە ازاماتتارعا مەملەكەتتىك قىزمەتتەردى ۇسىنۋ مەرزىمدەرىن قىسقارتادى, سونداي-اق قىزمەتكەرلەردىڭ حالىقپەن تىكەلەي بايلانىسىن بولدىرمايدى جانە سىبايلاس جەمقورلىق تاۋەكەلدەرىن تومەندەتەدى.

ىشكى ىستەر ءمينيسترى ەرلان تۇرعىمباەۆ ءىىم-ءنىڭ مەملەكەتتىك قىزمەت كورسەتۋ سالاسىنداعى ەڭ باستى ۇستانىمى – قىزمەتتەردى اۆتوماتتاندىرۋ, جەدەلدىلىگىن ارتتىرۋ, اشىقتىعىن قامتاماسىز ەتۋ جانە سىبايلاس جەمقورلىقتى ازايتۋ بولىپ تابىلاتىنىن اتاپ ءوتتى.

– بۇگىندە ءبىزدىڭ بارلىق ارەكەتىمىز مەملەكەتتىك قىزمەتتەردىڭ ساپاسىن جاقسارتۋعا باعىتتالعان. ەڭ باستىسى, ادامدار ولاردى ۇيدەن نەمەسە كەڭسەدەن شىقپاي-اق تەز جانە ەشقانداي اۋرەگە تۇسپەي الا الادى. سونىمەن قاتار, شەشىم قابىلداۋدىڭ ءاربىر كەزەڭىندە ۋاقىتىلى جانە وبەكتيۆتى ورىندالۋىن قاداعالاۋ كەرەك, – دەپ اتاپ ءوتتى ۆەدومستۆو باسشىسى.

بۇدان باسقا, تسيفرلاندىرۋ قىزمەتتەردى ءبىرتۇتاس كورسەتۋگە مۇمكىندىك بەرەدى, ياعني ءبىر ءوتىنىش بويىنشا بىردەن ءوزارا بايلانىستى بىرنەشە قىزمەتتەردى الۋعا بولادى (بارلىعى توعىز قىزمەت ءتۇرى, ولاردىڭ جەتەۋى 2020 جىلى ەنگىزىلگەن).

وسىلايشا, ەڭبەك ميگرانتتارىنا ازاماتتاردىڭ ءۇي شارۋاشىلىعىندا جۇمىس ىستەۋىنە رۇقسات بەرۋمەن قاتار (“ەڭبەك پاتەنتى” دەپ اتالاتىن), ولارعا جسن جانە ۋاقىتشا تۇرۋعا رۇقسات راسىمدەلەدى.

بۇرىن بۇل قىزمەتتەردىڭ ارقايسىسى بولەك كورسەتىلەتىن. ەسەپتەر مەن مالىمەتتەردى اۆتوماتتاندىرۋ, ءارتۇرلى مەملەكەتتىك ورگانداردىڭ اقپاراتتىق جۇيەلەرىن ىقپالداستىرۋ ۆەدومستۆو كورسەتەتىن بىرقاتار قىزمەتتەردى جويۋعا مۇمكىندىك بەردى. مىسالى, 2019 جىلعى 1 قاراشادان باستاپ تۇرعىلىقتى جەرىنەن مەكەنجاي انىقتاماسىن بەرۋ جويىلدى (جىل سايىن 10 ملن-عا دەيىن بەرىلدى), 2020 جىلدىڭ قاڭتار ايىندا ەلدە ۋاقىتشا بولاتىن شەتەلدىكتەردى تىركەۋ توقتاتىلدى (جىل سايىن 1,2-1,6 ملن).

ەندى بۇل مالىمەتتەردى مەملەكەتتىك ورگاندار تىكەلەي اقپاراتتىق جۇيەلەردەن, ال ازاماتتار سمارتفوندارداعى ءموبيلدى قوسىمشالار ارقىلى الادى.

پوليتسيانىڭ تىركەۋ-ەمتيحان بولىنىستەرى قىسقارتىلدى, ەندى اۆتوكولىكتەردى ەسەپتەن شىعارۋ جانە تىركەۋ, مەملەكەتتىك ءنومىر بەلگىسىن تاڭداۋ جانە دايىن قۇجاتتاردى جەتكىزۋگە تاپسىرىس بەرۋ قاشىقتىقتان جۇزەگە اسىرىلادى, ءىىم بازالارى بويىنشا بارلىق تەكسەرۋلەر اۆتوماتتاندىرىلعان. ىشكى ىستەر ورگاندارى جۇيەسىندە مەملەكەتتىك قىزمەتتەر كورسەتۋ پروتسەستەرىن وڭايلاتۋ, ولاردىڭ ساپاسى مەن حالىققا قولجەتىمدىلىگىن ارتتىرۋ, اكىمشىلىك كەدەرگىلەر مەن سىبايلاس جەمقورلىقتى تۋعىزاتىن جاعدايلاردى بولدىرماۋ جونىندەگى جۇمىستار جالعاسا بەرەدى.