بيىل ەلىمىزدىڭ قارجى سالاسىندا ورىن العان وقيعالاردىڭ ءبىرى – جەكە تۇلعالاردىڭ سالىقتىق قارىزدارىنىڭ كەشىرىلۋى. مەملەكەت باسشىسى قاسىم-جومارت توقاەۆتىڭ تىكەلەي تاپسىرماسىمەن جۇزەگە اسىرىلعان بۇل شارا قازاقستاندىقتاردىڭ قارىزدىق جۇكتەمەسىن ايتارلىقتاي ازايتتى.
سالىق راقىمشىلىعى بۇگىن, ياعني 31 جەلتوقساندا اياقتالادى. رەسمي دەرەكتەرگە سۇيەنسەك, بۇل مۇمكىندىكتى 820 157 قازاقستاندىق ءتيىمدى پايدالانعان. ولار 11,5 ملرد تەڭگە كولەمىندەگى نەگىزگى قارىزدى جاپقان. سونىڭ ناتيجەسىندە اتالعان قارىزدار بويىنشا جيناقتالعان 1,4 ملرد كولەمىندەگى ءوسىمپۇل كەشىرىلدى.
مەملەكەتتىك كىرىستەر كوميتەتىنىڭ حابارلاۋىنشا, ەل تۇرعىندارى 100 299-ى كولىك سالىعىن, 482 587-ءسى جەر سالىعىن جانە 505 677-ءسى م ۇلىك سالىعىن تولەمەگەن. بۇگىنگى تاڭدا 21 قازاقستاندىقتىڭ موينىندا 4 ملن تەڭگە كولەمىندەگى كولىك سالىعى بار. 15 قازاقستاندىق 1 ملن تەڭگە كولەمىندەگى جەر سالىعىن تولەمەگەن. سونداي-اق 33 ادام 1 ملن تەڭگە كولەمىندەگى م ۇلىك سالىعىن مەملەكەتكە تولەۋى ءتيىس.
جالپى العاندا سالىق راقىمشىلىعىنا دەيىن 1,5 ملن جەكە تۇلعانىڭ 24,6 ملرد تەڭگە كولەمىندەگى سالىقتىعى بەرەشەگى بولعان ەدى. ونىڭ 20,3 ملرد تەڭگەسى – نەگىزگى بەرەشەك, 4,3 ملرد تەڭگەسى – ءوسىمپۇل.
2020 جىلى قارجى سالاسىنداعى تسيفرلاندىرۋ جۇمىستارى دا ويداعىداي جالعاستى. بۇل دا مەملەكەت ماڭىز بەرىپ وتىرعان ۇلكەن مىندەتتەردىڭ ءبىرى. ويتكەنى تسيفرلاندىرۋ كولەڭكەلى ەكونوميكانىڭ ۇلەسىن قىسقارتىپ, قىزمەتتەر ساپاسىن ارتتىرۋعا جول اشادى. سونداي-اق بيۋدجەتكە قوسىمشا تۇسىمدەر ءتۇسىرۋدى قامتاماسىز ەتەدى. وسى ورايدا, «استانا-1» جۇيەسىن بولە-جارا اتاپ وتۋگە ءتيىسپىز. قارجى مينيسترلىگىنىڭ حابارلاۋىنشا, قاراشا ايىنىڭ ورتاسىنداعى دەرەك بويىنشا «استانا-1» جۇيەسىندە 2,7 ملن-نان استام دەكلاراتسيا وڭدەلگەن. ونىڭ ىشىندە 2,2 ملن-نان استام دەكلاراتسيا اۆتوماتتى رەجىمدە 1 مينۋتتىڭ ىشىندە شىعارىلعان.
سونىمەن قاتار سىرتقى ەكونوميكالىق قىزمەتكە قاتىسۋشىلار ءۇشىن ەكسپورتتىق-يمپورتتىق وپەراتسيالار بويىنشا ء«بىر تەرەزە» پورتالى ىسكە قوسىلدى. ونىڭ جۇمىسى كەدەندىك رەسىمدەۋ ۇدەرىستەرىنە دەيىن تۋىندايتىن تاۋاردى جىكتەۋ بويىنشا ءتۇرلى سەرتيفيكاتتاردى, رۇقساتتاردى, الدىن الا شەشىمدەردى الۋ ماسەلەلەرىن شەشۋگە باعىتتالعان.
تسيفرلاندىرۋ باعىتىنداعى كەلەسى قادام تاۋارلاردىڭ تاڭبالانۋى بولماق. «تاڭبالاۋ» اقپاراتتىق جۇيەسى تۇتىنۋشىنى كونترافاكتىلىك ونىمنەن جانە جوسىقسىز باسەكەلەستىكتەن قورعايدى.
تاۋارلاردى قۇجاتتىق تۇرعىدان باقىلاۋ «ەلەكتروندى شوت-فاكتۋرالار» اقپاراتتىق جۇيەسىندە جۇزەگە اسىرىلۋدا. وندا قوسىمشا قۇن سالىعىن تولەۋشىلەر 2019 جىلعى 1 قاڭتاردان باستاپ شوت-فاكتۋرالاردى ەلەكتروندى تۇردە تولتىرادى. بۇل تاۋار اعىندارىنىڭ اشىقتىعىنا قول جەتكىزۋگە, باقىلاۋ جانە قوسىمشا قۇن سالىعىن قايتارۋ راسىمدەرىن وڭتايلاندىرۋعا مۇمكىندىك بەرەدى. بۇدان بولەك, «ەلەكتروندى شوت-فاكتۋرالار» اقپاراتتىق جۇيەسىندە سالىق تولەۋشىلەرگە ىڭعايلى بولۋ ءۇشىن ورىندالعان جۇمىستاردىڭ اكتىلەرى, ەلەكتروندىق شارتتار, سونداي-اق «ۆيرتۋالدى قويما» ءمودۋلى ىسكە اسىرىلدى. وندا ۆيرتۋالدى بەلگىلەر بويىنشا تاۋاردىڭ قوزعالىسى قاداعالانادى. قاداعالاناتىن تاۋارلار جۇيەسىندەگى سوڭعى قادام – ونلاين باقىلاۋ-كاسسالىق ماشيناسىن قولدانۋ. ول ساۋدا ءتۇسىمىنىڭ مالىمەتتەرىن تىركەيدى جانە ولاردى مەملەكەتتىك كىرىستەر ورگاندارىنىڭ سەرۆەرىنە ونلاين رەجىمدە ۇسىنادى.
الدىن الا دەرەكتەر بويىنشا بيىلعى 11 ايدىڭ قورىتىندىسى بويىنشا مەملەكەتتىك بيۋدجەتتىڭ اتقارىلۋ كورسەتكىشتەرى جوسپارداعىداي ورىندالعان. مەملەكەتتىك بيۋدجەتكە 8 ترلن تەڭگە كىرىس تۇسكەن. رەسپۋبليكالىق بيۋدجەتكە تۇسكەن كىرىس – 5 ترلن 224 ملرد تەڭگە. جالپى كىرىستەر بويىنشا جوسپار 74 ملرد تەڭگەگە ارتىعىمەن ورىندالعان.
مينيسترلىكتىڭ مالىمەتىنشە, 2016-2020 جىلدارعا ارنالعان جەكەشەلەندىرۋدىڭ كەشەندى جوسپارى 93 پايىزعا ورىندالدى. 2020 جىلى 76 نىساندى جەكەشەلەندىرۋ جوسپارلانعان ەدى. ونىڭ 37-ءى ساتىلىمعا شىعارىلدى. 11 ايدىڭ قورىتىندىسى بويىنشا 100,9 ملرد تەڭگەگە 8 نىسان ساتىلدى. 29 نىسان ساتىلىمدا تۇر, جەتەۋى قايتا ۇيىمداستىرۋعا جانە تاراتۋعا جىبەرىلدى. 20 نىساندى جەكەشەلەندىرۋ مەرزىمى 2021-2024 جىلدارعا اۋىستىرىلدى.