رەسپۋبليكامىزدىڭ باتىستاعى قاقپاسى – ورال قالاسىندا ءوندىرىستىڭ وزگە سالالارىنا قاراعاندا ماشينا جاساۋ جانە قورعانىستىق-ونەركاسىپتىك كەشەن سىندى ستراتەگيالىق سيپاتتاعى سالالار جاقسى دامىعان. ياعني, ەلىمىزدىڭ اتالعان كەشەن اياسىنداعى باستى باعىتىن ايقىندايتىن فاكتورلار اقجايىق ايماعىندا قالىپتاسقان دەسەك قاتەلەسە قويماسپىز.
«قازاقستان ينجينيرينگ» ۇك اق قۇرامىنا كىرەتىن وڭىردەگى قورعانىس كاسىپورىندارى سوڭعى ۋاقىتتا ارنايى ءوندىرىس تۇرلەرىن كونۆەيەرگە قويۋ ءۇشىن جاڭاشا ءبىر بەتبۇرىس جاساي باستاعانى بايقالادى.
سولاردىڭ ءبىرى باتىس قازاقستان ماشينا جاساۋ كومپانياسى بولىپ وتىر. راس, اتالعان كاسىپورىن كەيىنگى كەزدە بۇيىعى كۇي كەشىپ, توماعا تۇيىق قالعانداي كورىنەتىن. ايتسە دە بۇل تەك سىرتقى قۇبىلىس بولىپ شىققانىنا سۇيسىنبەسەك رەنجىمەيتىن شىعارمىز. شىنتۋايتىنا كەلگەندە, مۇندا بۇعان دەيىنگى مورالدىق تۇرعىدان ەسكىرگەن قۇرال-جابدىقتار ىعىستىرىلىپ, جاڭا زاماناۋي تەحنولوگيالار ەنگىزىلىپ جاتىر ەكەن. سونىڭ نەگىزىندە كەڭەستىك كەزەڭدەگى «مەتالليست» قارۋ-جاراق زاۋىتىندا بيىل جاڭا جوبالار قولعا الىنا باستاپتى.
سونىڭ ءبىرى – مەملەكەتىمىزدەگى قۇرلىق اسكەرلەرىنىڭ نەگىزگى قارۋى بولىپ تابىلاتىن زەڭبىرەك دەۋگە ابدەن بولادى. وسىلايشا ەلىمىزدە تۇڭعىش رەت كۇشى جويقىن زەڭبىرەك شىعارۋ ءوندىرىسى باستالدى دەۋگە تولىق نەگىز بار. ءسويتىپ الدىمىزداعى 2021 جىلدان باستاپ وتاندىق كاسىپورىندا مەملەكەتتىك-قورعانىستىق تاپسىرىسقا سايكەس اتالعان قارۋ ءتۇرى جاسالماق. بۇل ءۇشىن زاۋىتتاعى بۇعان دەيىنگى سىناق ورتالىعى قايتا جاراقتاندىرىلعان. سونداي-اق قارۋ-جاراق وندىرىسىنە قاجەتتى پوليگون ماسەلەسى دە ءوز شەشىمىن تاۋىپ ۇلگەرگەن. باتىس قازاقستان ماشينا جاساۋ كومپانياسىنا قۇرلىقتا قولدانىلاتىن قارۋلارعا قوسا تەڭىز قارۋلارىن قۇراستىرۋعا دا ليتسەنزيا بەرىلگەن.
ورال