2020 جىلدىڭ باسىنان باستاپ ەكولوگيا, گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى 85,2 ملن شاباقتى بالىقتىڭ قىرىلۋ قاۋپى بار جانە سۋ قويمالارىنان, سونداي-اق ەلىمىزدىڭ كۇرىش چەكتەرىنەن قۇتقارۋ جۇمىستارىن جۇرگىزدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
بۇل جۇمىسقا بالىق شارۋاشىلىعى سۋبەكتىلەرى, ەرىكتىلەر, سونداي-اق كۇرىش وسىرەتىن ۇيىمداردىڭ وكىلدەرى قاتىستى. ناتيجەسىندە, اتىراۋ وبلىسىندا 56,7 ملن بالىق, تۇركىستان وبلىسىندا – 10,3 ملن, قىزىلوردا وبلىسىندا – 8,3 ملن, باسقا وڭىرلەردە – 9,9 ملن شاباق بالىق قۇتقارىلدى.
قۇتقارىلعان بالىقتاردىڭ تۇرلىك قۇرامى-سازان, اقمارقا, موڭكە, قارعا, قۇماي, وسمان, كوكسەركە, الابۇعا, شورتان, تۇقى, تابان, تورتا, وڭعاق.
بالىق رەسۋرستارىن ساقتاۋ بويىنشا ءىس-شارالاردى وتكىزۋگە 851 ادام جانە 153 بىرلىك تەحنيكا جۇمىلدىرىلدى.
يحتيولوگتاردىڭ مالىمەتتەرى بويىنشا قازاقستاندا بالىقتىڭ 100-دەن استام ءتۇرى مەكەندەيدى. ولاردىڭ 70-ءى ونەركاسىپتىك قۇندىلىققا يە, 18 ءتۇرى قازاقستاننىڭ قىزىل كىتابىنا ەنگىزىلگەن.