ەلىمىزدىڭ دەنساۋلىق ساقتاۋ ۆيتسە-ءمينيسترى اجار عينايات الداعى 26 قازاننان باستاپ جۇمىسىن باستايتىن كينوتەاترلارعا قانداي تالاپتار قويىلاتىنىن وكق-دا وتكەن ءباسپاسوز ءماسليحاتىندا ايتىپ ءوتتى, دەپ حابارلايدى Egemen.kz
"كينوتەاتردىڭ جۇمىسىنا "جاسىل ايماققا" كىرەتىن وڭىرلەردە, ەپيدەميالىق جاعدايى تۇراقتى, اۋرۋ جاعدايى جوق ايماقتاردا عانا رۇقسات بەرىلەدى. كينوتەاترلارعا بارعاندا كوروناۆيرۋستىڭ تارالۋىن بولدىرماۋ ماقساتىندا مينيسترلىك بەلگىلى تالاپتار الگوريتمىن بەكىتتى. ولار: كىرۋ بيلەتىن مۇمكىندىگىنشە ونلاين رەجيمدە ساتۋ, زالداردىڭ تولۋىن 30 پايىزدان اسىرماۋ, سونىمەن بىرگە وتىرعىزۋ كەزىندە الەۋمەتتىك اراقاشىقتىق ساقتالۋى ءتيىس. سونىمەن قاتار زالداردى دەزينفەكتسيالاۋ ءۇشىن كەمىندە 30 مينۋتتىق سەسسيالار اراسىندا ءۇزىلىس ساقتالۋى كەرەك. الەۋمەتتىك اراقاشىقتىق پەن ماسكا رەجيمى ساقتالۋى ءتيىس. نىسان اشىلعانعا دەيىن دەزينفەكتسيا قۇرالدارىن قولدانا وتىرىپ, جالپى تازارتىپ تۇرۋ كەرەك. كىرەبەرىستەگى قىزمەتكەرلەر كەلۋشىلەردىڭ ماسكا رەجيمىن ساقتاۋىنىڭ, دەنە قىزۋىنىڭ ولشەنۋىنە قامتاماسىز ەتەدى", دەدى اجار عينايات.
ۆيتسە-ءمينيستردىڭ ايتۋىنشا بارلىق كينوتەاتر جۇمىسىن سانيتارلىق دارىگەرلەر تەكسەرىپ, جەكەلەپ رۇقسات بەرەتىن بولادى. ەگەر بارلىق شارالار ساقتالسا, ولاردىڭ جۇمىس جۇرگىزۋگە رۇقسات بەرىلەدى.