بۇگىنگى كۇنى ەل اۋماعىنداعى ءدارىحانالاردا ءدارى-دارمەك باعاسىنىڭ كۇرت ءوسۋ دەرەكتەرى ءجيى كەزدەسۋدە. وسىعان وراي, "تۇركىستان – ادالدىق الاڭى" جوبالىق كەڭسەسىنىڭ ۇيىمداستىرۋىمەن وبلىس ورتالىعىنداعى بىرقاتار دارىحانالارعا ءدارى-دارمەك باعاسىنىڭ تۇراقتىلىعىن قامتاماسىز ەتۋ ماقساتىندا مونيتورينگ جۇمىستارى جۇرگىزىلدى, دەپ حابارلايدى Egemen.kz.
قۇرامىندا سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىنىڭ ۋاكىلى, اعا وفيتسەر اقتورە تالعات ۇلى , "تۇركىستان -ادالدىق الاڭى" جوبالىق كەڭسەسىنىڭ مەنەدجەرلەرى, تاۋارلارمەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ۋاكىلدەرى, ۇەم "باسەكەلەستىكتى قورعاۋ جانە دامىتۋ" تۇركىستان وبلىسى بويىنشا دەپارتامەنتىنىڭ قىزمەتكەرلەرى جانە وبلىستىق "اتامەكەن" ۇلتتىق كاسىپكەرلەر پالاتاسىنىڭ وكىلدەرى بار ارنايى جۇمىسشى توپ دارىحانالارداعى ءدارى-دارمەكتەردىڭ باعاسىنا زەردەلەۋ جۇمىستارىن جۇرگىزدى. مونيتورينگ بارىسىندا ءدارىحانالاردىڭ بىرىندە كاسسالىق اپپاراتتىڭ بولماۋى جانە ءدارى-دارمەك باعاسىنىڭ نەگىزسىز كوتەرىلۋى سىندى بىرقاتار كەمشىلىكتەر انىقتالىپ, اتالعان ولقىلىقتاردى تۇزەتۋگە قاتىستى جاۋاپتى ماماندارعا تاپسىرما بەرىلدى.