مادەنيەت جانە سپورت ءمينيسترى ا.رايىمقۇلوۆا ۇستىمىزدەگى جىلدىڭ 26 ماۋسىمى كۇنگى ساعات 16:00-دە "مەملەكەتتىك ءتىل جانە باق-2020" رەسپۋبليكالىق بايقاۋى جەڭىمپازدارىن نۇر-سۇلتان قالاسى, ساۋران كوشەسى, 7/ا مەكەنجايى بويىنشا ونلاين رەجيمىندە ماراپاتتايدى, - دەپ حابارلايدى Egemen.kz.
قولىنا قالام مەن ميكروفون ۇستاعان جۋرناليستەردىڭ ءداستۇرلى دوداسىن قازاقستان رەسپۋبليكاسى مادەنيەت جانە سپورت مينيسترلىگىنىڭ ءتىل ساياساتى كوميتەتى جانە شايسۇلتان شاياحمەتوۆ اتىنداعى ء"تىل-قازىنا" ۇلتتىق عىلىمي-پراكتيكالىق ورتالىعى جىل سايىن ۇيىمداستىرادى.
بايقاۋ ەرەجەسىنىڭ تالاپتارىنا سايكەس, ۇسىنىلعان جۋرناليستىك ەڭبەكتەردىڭ مازمۇنى – مەملەكەتتىك ءتىلدىڭ قىزمەت ەتۋ اياسىن كەڭەيتۋ, مارتەبەسىن نىعايتۋ, قازىرگى احۋالىن تالداۋ جانە وعان مونيتورينگ جۇرگىزۋگە باعىتتالۋى شارت.
جەڭىمپازدار "ۇزدىك ماقالا", "ۇزدىك تەلەباعدارلاما", "ۇزدىك راديوباعدارلاما", "ۇزدىك سايت ماقالاسى" نوميناتسيالارى بويىنشا ماراپاتتالادى.
كونكۋرسقا ەلىمىزدىڭ تۇكپىر-تۇكپىرىنەن 56 جۋرناليست قاتىسىپ, 116 ماتەريال تالقىعا ءتۇسىپ وتىر.
اتالىم بويىنشا جىكتەسە, تومەندەگىشە بولىپ شىعادى:
"ۇزدىك ماقالا" بويىنشا قاتىسۋشىلار سانى – 24, ماتەريالدار سانى – 49; "ۇزدىك سايت ماقالاسى" بويىنشا قاتىسۋشىلار سانى – 12, ماتەريالدار سانى – 25; "ۇزدىك راديوباعدارلاما" بويىنشا قاتىسۋشىلار سانى – 11, ماتەريالدار سانى – 23; "ۇزدىك تەلەباعدارلاما" بويىنشا قاتىسۋشىلار سانى – 9, ماتەريالدار سانى – 19.ەلىمىزگە بەلگىلى قالام قايراتكەرلەرى مەن تانىمال جۋرناليستەردەن قۇرىلعان قازىلار القاسىنىڭ جاقىندا وتكەن وتىرىستا قىزۋ تالقىلاۋدان كەيىن قابىلداعان ورتاق شەشىمى سول كۇنى سالتاناتتى تۇردە جاريا بولادى.
"جۇزدەن – جۇيرىك, مىڭنان – تۇلپار" شىققان بيىلعى جەڭىمپازداردىڭ ەسىمىن قالىڭ جۇرتشىلىق نازارىنا جەتكىزۋگە اسىعايىق!