اۋەجايدا ۋاقىت قىسقارتپاق بولىپ, وزىمەن بىرگە الا شىققان ءبىر قىزىق كىتاپتىڭ بەتىن اشقانى سول ەدى, كەنەت جارناما اگەنتتىگىنىڭ ءبىر قىزمەتكەرى جانىنا كەلىپ: ء«سالاماتسىز با, – دەدى ونى كوپتەن تانيتىن كىسى سياقتى ك ۇلىمسىرەپ. – كەشىرىڭىز, ءسىز ءجيى ۇشاسىز با؟ ولاي بولسا, ءبىز وسىنداعى رەستوراندارعا, كافەلەرگە, سونداي-اق, ءارتۇرلى اقىلى قىزمەتتەرگە جيىرما پايىزعا دەيىن جەڭىلدىك جاساي الامىز».
«راحمەت, – دەدى ول ويى ءبولىنىپ, كوڭىلىنە كىربىڭ تۇسكەنىن سەزدىرگەندەي سالقىن قاباق تانىتىپ. – بىلەمىن».
«تىڭداڭىزشى, بۇل سىزگە...».
«جو-جوق. قاجەت ەمەس».
جارناما اگەنتىنىڭ جۇزىندەگى جىلى شۋاق بۇلتقا جاسىرىنعان كۇن سەكىلدى لەزدە كۇڭگىرت تارتتى دا جارناماعا ەرىپ, ءاپ-ساتتە تۇتىنۋشىعا اينالا سالماعان جانعا وكپەلەگەندەي جالت بۇرىلىپ كەتتى.
ول كىتاپقا قايتا ءۇڭىلىپ, ونداعى قىزىق وقيعا جەلىسىنە ەندى-ەندى ەنە باستاعاندا ناق توبەسىنەن تونە قاراعان تاعى ءبىر كىسىنىڭ: ء«اي, باۋىرىم, قايدا بارىپ تەمەكى تارتىپ الساق بولادى ەكەن, ا؟!» دەگەن داۋسى جەتتى قۇلاعىنا.
ء«تۇ-ۋھ!» دەدى ىشتەي كەيىپ. «بىلمەيمىن».
ارادا جانە بىرنەشە مينۋت وتكەندە ەتجەڭدىلەۋ كەلگەن ءبىر اپاي اياعىن بالپاڭ-بالپاڭ باسىپ بارا جاتىپ ۇشاققا وتىرعىزۋ ءدالىزىنىڭ قايدا ەكەنىن سۇرادى. ودان كەيىن قولىندا ءسابيى بار جاس كەلىنشەككە «انا مەن بالا» بولمەسىنىڭ قايدا ەكەنىن كورسەتىپ, ءجون سىلتەپ جىبەرۋگە تۋرا كەلدى.
ول ءتىپتى, قولىنداعى كىتاپتىڭ كەلەسى بەتىن اشىپ تا ۇلگەرگەن جوق. ويتكەنى قاسىنداعى ورىندىقتا وتىرعان تورتپاق دەنەلى, قاراسۇر كىسى قول جۇكتەرىن قاراي تۇرۋىن ءوتىنىپ, اجەتحاناعا قاراي بەتتەدى.
وسى ساتتە: «ياپىر-اۋ, وسى جۇرت مەنى نەگە مازالاي بەرەدى؟ – دەگەن وي كەلدى وعان. – باسقالاردان سۇراسا بولماي ما؟».
كىتاپتان باسىن كوتەرىپ, جان-جاعىنا قاراپ ەدى, قاز-قاتار تىزىلگەن ورىندىقتا وتىرعان جولاۋشىلاردىڭ بارلىعى دەرلىك قالتا تەلەفوندارىنا ءۇڭىلىپ, قىبىر ەتپەي قالىپتى.
كەنەت ول ءوزىنىڭ كوپتەن ءبولىنىپ, بوتەن سوقپاققا ءتۇسىپ كەتكەنىن ءتۇسىندى. راسىندا دا بۇگىنگى ەل ءبىر-بىرىمەن ينتەرنەت ارقىلى جالعاسىپ, ينتەرنەت ارقىلى تانىسىپ, وي ءبولىسىپ, جۇمىس ىستەپ جاتقاندا, ولاردىڭ قاتارىنداعى جاي عانا كىتاپ وقىپ وتىرعان كىسى نە ىستەرىن بىلمەي, ەرىگىپ وتىرعان بىرەۋ بولىپ كورىنبەي مە!..
تاپ وسى ساتتە اۋەجايداعى حابارلاندىرۋ بيۋروسى ولار بيلەت العان ۇشاققا وتىرعىزۋ سەگىزىنشى دالىزدە باستالعانىن حابارلادى. ءبىر قىزىعى, ول قولىنداعى كىتاپتىڭ بەتىن جاۋىپ, ورنىنان تۇرۋى مۇڭ ەكەن, كوڭىل كۇيىنە كىربىڭ ۇيالاتقان الگى ءبىر جاعىمسىز وي سول جەردە توگىلىپ قالعانداي بويى-باسى جەڭىلدەپ, ەركىن تىنىس الدى.
انە, سول كەزدە بارىپ ونىڭ ىشكى دۇنيەسىندە: «بالكىم, كىتاپ وقىپ وتىرعان كىسى وزگەلەرگە قاراعاندا الدەقايدا قايىرىمدى, جۇرەگىنىڭ جىلۋى بار, ءيى جۇمساق جان بولىپ كورىنەتىن شىعار,» دەگەن وي شۋاق شاشتى.