قۇرمەتكە لايىق ديپلومات

1981-1989 جىلدارى م.ەسەناليەۆ قازاق كەڭەستىك سوتسياليستىك رەسپۋبليكاسى سىرتقى ىستەر مينيسترلىگىن باسقاردى. ول باسشىلىق ەتكەن كەزەڭدە رەسپۋبليكا سىرتقى ساياسات ۆەدومستۆوسىنىڭ كادرلىق الەۋەتى ارتىپ, قىزمەتكەرلەرىنىڭ بىلىكتىلىگى دە ارتا ءتۇستى. ولار كەيىنگى ۋاقىتتا تاۋەلسىز قازاقستاننىڭ سىرتقى ىستەر مينيسترلىگىنىڭ نەگىزىن قالاعان كاسىبي ديپلوماتتاردىڭ توبىن قالىپتاستىردى. م.ەسەناليەۆ ديپلوماتيالىق قىزمەتتەگىلەردىڭ الەۋمەتتىك مارتەبەسىن, ءبىلىمىن, تاعىلىمدامادان ءوتۋىن ارتتىرۋعا جانە كسرو-نىڭ شەتەلدىك مەكەمەلەرىندە ىلگەرىلەتۋگە, ءومىر ءسۇرۋ جاعدايلارىن تۇبەگەيلى جاقسارتۋعا كوپ كوڭىل ءبولدى. رەسپۋبليكالىق ءسىم-دە كونسۋلدىق جانە حاتتامالىق قىزمەتتەر مەن اقپاراتتىق-تالدامالىق جۇمىستاردىڭ ساپاسى ارتتى. ميحايل يۆانوۆيچ كەڭەس دەلەگاتسياسىنىڭ قۇرامىندا قازاقستان وكىلى رەتىندە بۇۇ باس اسسامبلەياسىنىڭ نيۋ-يوركتەگى سەسسيالارىنا قاتىستى, ءتورت قۇرلىقتا ونداعان ەلگە باردى.

سىرتقى ىستەر مينيسترلىگى وداق ورتالىعىنا تاۋەلدى قۇرىلىم بولعانىنا قاراماستان, 1980 جىلدارى بۇل مەكەمە تەڭدەسى جوق قۇرىلىم – قازاقستان رەسپۋبليكاسىنىڭ تولىققاندى سىرتقى ساياساتىنىڭ نەگىزىن قۇرۋشى ينستيتۋت رەتىندە نىعايتىلدى. كەڭەس وداعىنىڭ سوڭعى جىلدارى قازاقستان شەت مەملەكەتتەرمەن سىرتقى ەكونوميكالىق, مادەني-گۋمانيتارلىق بايلانىستاردى بەلسەندى تۇردە دامىتتى. رەسپۋبليكا باسشىلىعى تاراپىنان سىرتقى بايلانىستاردىڭ ءتيىمدى قىزمەت ەتۋىنىڭ ماڭىزدىلىعى دا ەسكەرۋسىز قالعان جوق. م.ەسەناليەۆتىڭ قازاقستاننىڭ حالىقارالىق قارىم-قاتىناستارىن نىعايتۋعا قوسقان ۇلەسىن سول كەزدە قازاق كسر-ءىنىڭ پرەمەر-ءمينيسترى رەتىندە سىرتقى ىستەر مينيسترلىگىنە جان-جاقتى قولداۋ كورسەتىپ, 1992 جىلعى 2 شىلدەدە ەگەمەندى مەملەكەت رەتىندە قازاقستان رەس­پۋب­ليكاسىنىڭ تولىققاندى ديپلوماتيالىق قىزمەتىنىڭ نەگىزىن قالاعان ەلباسى نۇرسۇلتان نازارباەۆ جوعارى باعالادى.

م.ەسەناليەۆتىڭ وچەركتەرى, كىتاپتارى مەن سۇحباتتارىندا باياندالعان ەستەلىكتەرىنىڭ ءبىز ءۇشىن ۇرپاقتار اراسىنداعى, وتكەن كۇن, قازىرگى شاق جانە كەلەشەك, سونداي-اق جالپى داۋىرلەر اراسىنداعى بايلانىس رەتىندەگى ماڭىزى زور. «بۇگىنگى ىستەردىڭ ماڭىزىن ءتۇسىنۋ ءۇشىن كەشەگى كۇننىڭ تاريحىن ءبىلۋ قاجەت», دەيدى ميحايل يۆانوۆيچ. سەبەبى ء«ار ءداۋىردىڭ ءوز مىندەتتەرى بار» (گەين), ال م.ەسەناليەۆ ءوز ءداۋىرىنىڭ جانە حالقىنىڭ لايىقتى وكىلى بولدى.

م.ەسەناليەۆ قازاقستان تاۋەلسىزدىككە قول جەتكىزگەننەن كەيىن 1990-جىلداردىڭ سوڭعى كۇندەرىنە دەيىن سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى بولىپ جۇمىس ىستەدى. سول كەزدەگى جاس ديپلوماتتار – ءبىز ءۇشىن جوعارى مەملەكەتتىك لاۋازىمدارعا يە م.ەسەناليەۆ قول جەتپەس بەلەس بولىپ كورىنەتىن. الايدا العاشقى اڭگىمە بارىسىندا پاراساتتى, قاراپايىم, سىپايى جانە جاناشىر ارىپتەس ەكەندىگىنە كوز جەتكىزدىك. اتالعان قاسيەتتەر مينيسترلىك قىزمەتكەرلەرىنە ۇلكەن اسەر ەتەتىن جانە ولار ءبىرتۋار تۇلعا – م.ەسەناليەۆكە ۇلكەن قۇرمەتىن بىلدىرەتىن. جاس بۋىن قازاقستاننىڭ جاڭا مەملەكەتتىك سالاسىنىڭ قىر-سىرىن ءبىلىپ, تاجىريبە جيناۋ ءۇشىن سول كەزدە م. ەسەناليەۆتىڭ سوڭىنان ەردى.

جىلدار ءوتىپ, داۋىرلەر وزگەرەدى, الايدا ميحايل ەسەناليەۆ سياقتى كورنەكتى تۇلعالاردىڭ مۇراسى ءاردايىم حالقىمىزدىڭ ەسىندە قالادى.

قايرات ءابدىراحمانوۆ,

قازاقستان رەسپۋبليكاسىنىڭ

سىرتقى ىستەر ءمينيسترى