مادەنيەت جانە اقپارات مينيسترلىگى الەۋمەتتىك جەلىدە پروديۋسەر بايان الاگوزوۆانىڭ «قىز جىبەك» فيلمىندەگى كيىمگە قاتىستى جاريالاعان جازباسىنا بايلانىستى مالىمدەمە جاسادى, دەپ حابارلايدى Egemen.kz.
ۆەدومستۆو اتالعان ماسەلەگە قاتىستى مىناداي ماڭىزدى جايتتاردى العا تارتتى:
«بىرىنشىدەن, «قازاقفيلم» كينوستۋدياسىنىڭ مۋزەي قورىندا «قىز جىبەك» فيلمىندە پايدالانىلعان ءبىر كامزولدىڭ تۇپنۇسقاسى ساقتاۋلى. بۇل جادىگەر ۇلتتىق كينو ونەرىنىڭ ماڭىزدى مادەني مۇراسى رەتىندە قورعالعان. ال پروديۋسەر جاريالاعان جازباداعى ەكىنشى كامزولدىڭ جەكە قولعا قالاي وتكەندىگى انىقتالۋدا.
ەكىنشىدەن, «قازاقفيلم» كينوستۋدياسى ۇلتتىق فيلمدەردە پايدالانىلعان قۇندى رەكۆيزيتتەردى, كوستيۋمدەر مەن باسقا دا تاريحي ماڭىزى بار زاتتاردى جۇيەلى تۇردە جيناقتاپ, قالپىنا كەلتىرۋ جانە ساقتاۋ جۇمىستارىن جۇرگىزىپ كەلەدى. بۇل باعىتتاعى جۇمىس ۇلتتىق مادەني مۇرانى كەلەشەك ۇرپاققا جەتكىزۋگە باعىتتالعان.
ۇشىنشىدەن, قازىرگى ۋاقىتتا «قازاقفيلم» جانىنان زاماناۋي تالاپتارعا ساي كەلەتىن اۋقىمدى مۋزەي اشۋ جوسپارلانۋدا. اتالعان مۋزەيدە وتاندىق كينو تاريحىنا قاتىستى بىرەگەي ەكسپوناتتار قويىلىپ, كەلۋشىلەرگە كەڭىنەن تانىستىرىلاتىن بولادى», دەلىنگەن حابارلامادا.
مينيسترلىك مادەني قۇندىلىقتاردى قورعاۋ ماسەلەسىنە ەرەكشە ءمان بەرەتىنىن جانە قوعامدا تۋىنداعان كەز كەلگەن سۇراققا اشىق جاۋاپ بەرۋگە دايىن ەكەنىن مالىمدەدى.