استانادا ازاماتتاردىڭ سەنىمىنە كىرىپ, ءىرى كولەمدە الاياقتىق جاساعان ەر ادامعا قاتىستى سوت ۇكىمى شىقتى. ءوزىن قاجىلىق ساپارىن ۇيىمداستىرۋشى رەتىندە تانىستىرعان ول 17 ادامدى الداپ, 7,4 ملن تەڭگەدەن استام قاراجاتتى زاڭسىز يەمدەنگەن, دەپ حابارلايدى Egemen.kz.
تەرگەۋ مالىمەتتەرىنە سۇيەنسەك, الاياق قاجىلىققا بارعىسى كەلگەن ازاماتتارعا جالعان اۋە بيلەتتەرى مەن قوناقۇي بروندارىن ۇسىنعان. ونىڭ قۇرىعىنا ەلىمىزدىڭ ءار وڭىرىنەن كەلگەن 17 تۇرعىن ىلىككەن. جابىرلەنۋشىلەردىڭ اراسىندا قارت اتا-انالارىن ۋمرا ساپارىنا جىبەرۋ ءۇشىن جىلدار بويى اقشا جيناعان وتباسىلار دا بار.
استانادا قاجىلىق ساپاردى جەلەۋ ەتكەن الاياق ۇستالدى
سوت تالقىلاۋى بارىسىندا ايىپتالۋشى ءوز كىناسىن تولىق مويىنداپ, جابىرلەنۋشىلەرگە كەلتىرىلگەن ماتەريالدىق زالالدى تولىعىمەن وتەگەن. سوت شەشىمىمەن وعان 3 جىل مەرزىمگە باس بوستاندىعىن شەكتەۋ جازاسى تاعايىندالىپ, پروباتسيالىق باقىلاۋ بەلگىلەندى.
وسى وقيعاعا بايلانىستى قالالىق پروكۋراتۋرا ازاماتتاردى بارىنشا ساق بولۋعا شاقىرادى:
قاجىلىق نەمەسە ۋمرا ساپارىن ۇيىمداستىرۋمەن تەك ارنايى ليتسەنزياسى بار تۋريستىك اگەنتتىكتەر عانا اينالىسۋى ءتيىس. اقشانى تەكسەرىلمەگەن جەكە تۇلعالاردىڭ شوتىنا اۋدارۋ – ۇلكەن قاۋىپ. كەز كەلگەن قىزمەت ءتۇرىن الماس بۇرىن رەسمي كەلىسىمشارت جاساسۋ قاجەت.