بۇگىن « ۇلى دالا ەلىنە ساياحات» جوباسىنىڭ قازاقستاننىڭ ەلورداسى – استانانىڭ 20 جىلدىعىن اتاپ وتۋگە ارنالعان «سارىارقا» باعىتى بويىنشا ءتورتىنشى ەكسپەديتسياسى باستالدى.
«سارىارقا» ەكسپەديتسيا باعىتى 4 قىركۇيەككە دەيىن سوزىلادى. 16 كۇن ىشىندە ەكسپەديتسيا كومانداسىنىڭ مۇشەلەرى اقمولا, پاۆلودار, قاراعاندى جانە سولتۇستىك قازاقستان وبلىستارىنىڭ ەڭ قىزىقتى جەرلەرىمەن 4595 شاقىرىم جول ءجۇرىپ وتەدى. ەكسپەديتسيا قۇرامىندا ساياحاتشىلار, تەلەۆيزيا جۋرناليستەرى, شەتەلدىك جانە قازاقستاندىق ترەۆەل-بلوگەرلەر بار.
قاتىسۋشىلار استانادان اقمولا وبلىسىنداعى ەرەيمەنتاۋ اۋدانى مەن قاراعاندى وبلىسىنداعى وساكاروۆ اۋدانى اۋماعىندا ورنالاسقان «بۇيراتاۋ» مەملەكەتتىك ۇلتتىق تابيعي ساياباعىنا جول تارتادى. ودان سوڭ ەكسپەديتسيا توبى پاۆلودار وبلىسىنداعى باياناۋىل ۇلتتىق ساياباعىنا, قارقارالى جانە كوكشەتاۋداعى مەملەكەتتىك ۇلتتىق تابيعي ساياباقتارىنا, قورعالجىن مەملەكەتتىك تابيعي قورىعىنا بارادى.
QazaqGeography رقب حالىقارالىق جانە عىلىمي جوبالار ءبولىمىنىڭ مەنەدجەرى نۇرجان العاشوۆ اتاپ وتكەندەي, ەكسپەديتسيا قورىتىندىلارى بويىنشا بىرنەشە جۇمىس جاسالادى. ءبىرىنشى كەزەكتە, « ۇلى دالا ەلىنە ساياحات» جوباسىنىڭ قورىتىندىسى بويىنشا ءتۋريزمدى دامىتۋ تۇرعىسىندا كۇردەلى ماسەلەلەر انىقتالىپ, ولاردى شەشۋگە قاتىستى ۇسىنىستار دايىندالادى. سونىمەن قاتار, تۋريستەر ءۇشىن جاڭا باعىتتار جاسالىپ, كورنەكتى جولنۇسقالار مەن فوتو-, بەينە- دەرەكتەر قورى قۇرىلادى.
ء«بىز ەل اۋماعىنداعى بۇل اۋقىمدى جوباعا قاتىسقانىمىزعا وتە قۋانىشتىمىز. بارلىعى جاقسى وتەدى دەگەن ويدامىز, وسى 16 كۇن ىشىندە ءبىز قازاقستاننىڭ بارلىق ادەمى جەرلەرى تۋرالى ايتامىز. ءاربىر قازاقستاندىق پەن شەتەلدىك قوناقتار ءبىزدىڭ كورىكتى جەرلەرىمىزگە تامسانۋى ءۇشىن, الەۋمەتتىك جەلىلەر مەن تەلەۆيدەنيەنى پايدالانامىز. وسى نىسانداردىڭ ارقايسىسىنىڭ وزىندىك قايتالانباس اتموسفەراسى بار. مىسالى, قورعالجىن قورىعىنداعى تەڭىز كولى 2000 جىلى الەمدەگى ەڭ ەرەكشە كولدەر كىرەتىن ء«تىرى كولدەر» حالىقارالىق جەلىسىنە ەندى», — دەدى نۇرجان العاشوۆ.
جالپى, جوبا ەلىمىزدەگى ەڭ ماڭىزدى تۋريستىك كلاستەرلەردى, سونداي-اق قازاقستاننىڭ ون ءبىر وبلىسى بويىنشا التى باعىتتى قامتيدى: «تيان-شان مارجاندارى», «التاي – وركەنيەت بەسىگى», «جوڭعار الاتاۋى», «سارىارقا», «تەڭىزدەن تەڭىزگە دەيىن» جانە «جاڭا جىبەك جولى». باعىتتار ءتۋريزمدى دامىتۋ ءۇشىن قىزىقتى تابيعي جانە كيەلى نىسانداردى مەيلىنشە كوپ قامتۋ ەسەبىمەن جوسپارلانعان. بەسىنشى جانە التىنشى باعىتتار قىزىلوردا, اقتوبە, ماڭعىستاۋ وبلىستارىنىڭ اۋماعىمەن جۇرەتىن «تەڭىزدەن تەڭىزگە دەيىن», سونىمەن قاتار تۇركىستان, جامبىل, الماتى وبلىستارى ارقىلى وتەتىن «جاڭا جىبەك جولى» بولادى. بۇل باعىت بويىنشا قازاقستاندىق قاتىسۋشىلارعا National Geographic رەسەي تەلەارناسىنىڭ توبى قوسىلادى.
«Kazakh Tourism» ۇلتتىق كومپانياسى قر ۇكىمەتىنىڭ قاۋلىسىمەن 2017 جىلى شىلدەدە قۇرىلعان. كومپانيانىڭ نەگىزگى مىندەتتەرى - ەلىمىزدىڭ تۋريستىك الەۋەتىن شەتەلدە دامىتۋ, سونىمەن قاتار قازاقستاننىڭ تۋريستىك سالاسىنا ينۆەستيتسيالار تارتۋ.
«QazaqGeography» بەس باعىت بويىنشا جۇمىس ىستەيدى: گەوگرافيا, كليمات; قورشاعان ورتا, تابيعي رەسۋرستار; بيوالۋانتۇرلىلىك; تۋريزم, ساياحات, ولكەتانۋ; تاريحي-مادەني مۇرا, ەتنوگرافيا. قازىر قازاقستان رەسپۋبليكاسىندا 11 وكىلدىگى اشىلعان.
مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ تاپسىرىسى بويىنشا «Kazakh Tourism» ۇك ۇيىمداستىرۋشىسى بولىپ تابىلاتىن «سارىارقا» باعىتىنىڭ ەكسپەديتسياسىن Kazakh Tourism-مەن ءوزارا ىنتىماقتاستىق تۋرالى مەموراندۋم اياسىندا QazaqGeography ىسكە اسىرادى.