جۇمىسپەن قامتۋ مۇمكىندىكتەرىن ارتتىرۋ ماقساتىندا ەلوردادا جۇيەلى تۇردە بوس ورىندار جارمەڭكەسى وتكىزىلىپ تۇرادى, دەپ حابارلايدى استانا اكىمدىگىنىڭ رەسمي سايتى.
جىل باسىنان 7 بوس جۇمىس ورىندارىنىڭ جارمەڭكەسى ءوتتى. ولاردىڭ بىرەۋى باس بوستاندىعىنان ايىرۋ مەكەمەلەرىنەن شىققان ازاماتتارعا, پروباتسيا قىزمەتتەرىنىڭ ەسەبىندە تۇرعان ازاماتتارعا ارنالدى.
مەملەكەتتىك الەۋمەتتىك تاپسىرىس اياسىندا «رەابيليتاتسيالىق تەحنولوگيالار مەن تۇجىرىمدار» قوعامدىق قورى جىل سايىن «باس بوستاندىعىنان ايىرۋ ورىندارىنان شىققان ازاماتتارعا قۇقىقتىق جانە پسيحولوگيالىق كومەك كورسەتۋ» جوباسىن ىسكە اسىرادى.
سونداي-اق, وسى جىلدىڭ باسىنان بۇگىنگە دەيىن تۇراقتى جۇمىس ورىندارىنا, قوعامدىق جۇمىستارعا, الەۋمەتتىك جۇمىس ورىندارى مەن جاستار تاجىريبەسى بويىنشا ۇسىنىلاتىن جۇمىس ورىندارىنا مۇمكىندىگى شەكتەۋلى 273 ادام ورنالاستىرىلدى. كاسىبي كۋرستارعا – 11 جىبەرىلدى. جۇمىسسىزدىقتان الەۋمەتتىك قورعاۋ شارالارىمەن 40 ادام قامتىلدى. ولاردىڭ 25-ءسى – باس بوستاندىعىنان ايىرۋ مەكەمەلەرىنەن بوساپ شىققان ازاماتتار, 15-ءسى – پروباتسيا قىزمەتتەرىنىڭ ەسەبىندە تۇرعاندار. 27 ادام تۇراقتى جۇمىس ورىندارىنا ورنالاستىرىلسا, 7 ادام جالاقىسى بار قوعامدىق جۇمىستارعا تارتىلدى. الەۋمەتتىك جۇمىس ورىندارىنا – 2, جاستار تاجىريبەسىنە – 1 جانە كاسىبي كۋرستارعا 3 ادام جىبەرىلدى.