كۇنى كەشە عانا ەلباسىمىز نۇرسۇلتان ءابىش ۇلى نازارباەۆ قازاقستان حالقىنا كەزەكتى جىل سايىنعى جولداۋىن ەلگە ۇسىندى. جولداۋدى حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ پروفەسسور-وقىتۋشىلار قۇرامى زور قىزىعۋشىلىقپەن قابىلداپ وتىر. بۇل جولداۋ جاڭا الەمگە, ياعني ءتورتىنشى ونەركاسىپتىك رەۆوليۋتسيا الەمىنە بەيىمدەلۋ مەن جەتىستىككە جەتۋ جولىن تابۋ ءۇشىن نە ىستەۋ قاجەتتىگىن ايقىنداپ بەردى.
اتاپ كورسەتىلگەندەي 10 باعىتقا جۇكتەلگەن جۇمىس – بارشا قازاقستاندىقتار بولىپ جۇمىلىپ اتقارىلار ابىرويلى ءىس. اسىرەسە جەتىنشى مىندەت: ادامي كاپيتال – جاڭعىرۋ نەگىزى. ءبىلىم بەرۋدىڭ جاڭا ساپاسى بويىنشا ەلباسى «بارلىق جاستاعى ازاماتتاردى قامتي الاتىن ءوزىمىزدىڭ الدىڭعى قاتارلى وزىق ءبىلىم بەرۋ جۇيەمىزدى قۇرۋدى جەدەلدەتۋىمىز كەرەك», دەپ ۇكىمەتكە ناقتى مىندەتتەمەلەر قويدى. قازىرگى زامان تالاپتارىنا سايكەس وقىتۋدىڭ مازمۇندىلىعى زاماناۋي تەحنيكالىق تۇرعىدان قولداۋ كورسەتۋ ارقىلى ۇيلەسىمدى تۇردە تولىقتىرىلۋعا ءتيىس. پرەزيدەنتىمىز ءوز جولداۋىندا «جوعارى وقۋ ورىندارى شەتەلدەردىڭ جەتەكشى ۋنيۆەرسيتەتتەرىمەن, عىلىمي ورتالىقتارىمەن, ءىرى كاسىپورىندارىمەن جانە ترانسۇلتتىق كورپوراتسيالارىمەن بىرلەسكەن جوبالاردى بەلسەندى تۇردە جۇزەگە اسىرۋى قاجەت. جوعارى وقۋ ورىندارىنا ءبىلىم بەرۋ باعدارلامالارىن جاساۋعا كوبىرەك قۇقىق بەرىپ, ولاردىڭ اكادەميالىق ەركىندىگىن زاڭنامالىق تۇرعىدان بەكىتۋ كەرەك. وقىتۋشىلاردىڭ قايتا دايارلىقتان وتۋىنە كۇش سالىپ, جوعارى وقۋ ورىندارىنا شەتەلدىك مەنەدجەرلەردى تارتىپ, الەمدىك ۋنيۆەرسيتەتتەردىڭ كامپۋستارىن اشۋ قاجەت», دەپ قازاقستاندىق جوعارى وقۋ ورىندارى الدىنا جاڭا تالاپتار جۇكتەپ وتىر.
ءوز باسىم ەلباسىنىڭ بۇل تالاپتارىن زامانعا لايىق, كەزەڭى كەلگەن جانە ورىندالۋى اسا قاجەت مىندەتتەر دەپ سانايمىن. قازىرگى تاڭدا حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە ەلباسى تاپسىرمالارىنان تۋىندايتىن جۇمىستار قولعا الىنىپ, جاڭاشا ستراتەگيالىق دامۋ جوسپارى جاسالىنىپ جاتىر. بۇگىندە اتىراۋ ۋنيۆەرسيتەتىنىڭ عىلىمي-زەرتتەۋ باعىتىنداعى جۇمىستارىن دامىتۋ ءۇشىن كوپتەگەن شەتەل ۋنيۆەرسيتەتتەرىمەن جانە عىلىمي-زەرتتەۋ ۇيىمدارىمەن تىعىز بايلانىستار ورنادى. مۇنىڭ بارلىعى مەملەكەتتىك ۋنيۆەرسيتەتتەر اسسوتسياتسياسى اياسىندا كاسپي ماڭى مەملەكەتتەرى – رەسەي, يران, ازەربايجان, سونداي-اق اقش, ۇلىبريتانيا جانە تۇركيا ەلدەرىمەن قارىم-قاتىناستان كورىنەدى. بيىلعى وقۋ جىلىندا ۋنيۆەرسيتەتىمىزدە «ENGLISH ONLY SPACE» – ەكى كومپونەنتتەن تۇراتىن, اعىلشىن ءتىلىن ۇيرەنۋگە ارنالعان يننوۆاتسيالىق كەشەن جانە «I SPACE» – ستۋدەنت جاستارعا, قالا تۇرعىندارىنا كاسىپكەرلىك مادەنيەت پەن داعدىلاردى قالىپتاستىرۋعا, ستارتاپتاردى ىسكە قوسۋعا جانە جاڭا كومپانيالاردىڭ دامۋىنىڭ باستاپقى كەزەڭىندە وسۋىنە ىقپال ەتۋىنە باعىتتالعان, ۋنيۆەرسيتەت قىزمەتىنىڭ يننوۆاتسيالىق نىسانى, كوۆوركينگ الاڭى سىندى ورتالىقتار ىسكە قوسىلدى. وسى جۇمىستاردىڭ بارلىعى دا پرەزيدەنتىمىز نۇرسۇلتان نازارباەۆتىڭ وزگەرىستەر مەن سىن-قاتەرلەرگە دايىن بولۋ قاجەتتىگىن ەسكەرىپ, «قازاقستان-2050» دامۋ ستراتەگياسىن قابىلداپ, «100 ناقتى قادام» ۇلت جوسپارىنىڭ جۇزەگە اسىرىلۋىنىڭ ارقاسىندا قول جەتكىزە العان جەتىستىكتەرىمىز دەپ بىلەمىن. ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ پروفەسسور-وقىتۋشىلار قۇرامى مەن بارشا ۇجىمى ەلباسىمىزدىڭ ءتورتىنشى ونەركاسىپتىك رەۆوليۋتسيا الەمىنە بەيىمدەلۋ مەن جەتىستىككە جەتۋ جولىن تابۋ جوسپارى سانالاتىن جولداۋىن تولىقتاي قولداپ جاڭا زامانعا ساي بولۋ ءۇشىن جۇمىلا ەڭبەك ەتىپ, قازاقستاننىڭ جارقىن بولاشاعى جولىندا بيىك ماقساتتارعا قول جەتكىزەدى.
ابزال تالتەنوۆ, حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى