الايدا اتىراۋ وبلىسىنىڭ دامۋ كورسەتكىشتەرى جوعارى.
اتىراۋ وبلىسىنىڭ الەۋمەتتىك-ەكونوميكالىق دامۋ كورسەتكىشتەرى جىل ساناپ ارتىپ كەلەدى. مەملەكەت باسشىسىنىڭ بيىلعى حالىققا جولداۋىن جۇزەگە اسىرۋعا ايماقتا بارلىق جاعداي بار. ەلىمىزدىڭ دامۋ باسىمدىقتارىن ايقىندايتىن, بولاشاققا باعدار بەرەتىن ايرىقشا ماڭىزداعى قۇجات – جولداۋدى تالقىلاۋعا ارنالعان اكتيۆ جيىنىندا وبلىس اكىمى نۇرلان نوعاەۆ وسىلاي دەدى.
يگىلىكتى ىستەر جالعاسىن تابادى
– قازاقستان الەمنىڭ ەڭ دامىعان ەلدەرىنىڭ قاتارىنا ەنۋدى ماقسات قىلىپ قويدى. مەملەكەتىمىزدىڭ 2050 جىلعا دەيىن دامۋ ستراتەگياسى, «100 ناقتى قادام» ۇلت جوسپارى, كونستيتۋتسيالىق رەفورمالار, رۋحاني جاڭعىرۋ باعدارلاماسى – ءبىزدى وسى ۇلى مۇراتقا جەتەلەيتىن جول. وسى باعىتتا ۇلان-عايىر جۇمىستار اتقارىلىپ, اۋقىمدى مەملەكەتتىك جوبالار ىسكە اسىرىلىپ جاتىر, دەدى ن.نوعاەۆ. – بيىلعى جولداۋدا سان ەمەس, ساپاعا كوڭىل ءبولۋ, باسقالاردىڭ جەتىستىكتەرىن قايتالاۋمەن شەكتەلمەي, ءوزىمىز باسقاعا ۇلگى بولۋ مىندەتى قويىلىپ وتىر. بۇل ءۇشىن نە ىستەۋىمىز كەرەك, قالاي ىستەۋىمىز كەرەك, مۇنىڭ ءبارى – جولداۋدىڭ 10 باعىتىندا ناقتى كورسەتىلگەن.
«وتكەن جىلدىڭ قورىتىندىسى بويىنشا, وڭىردەگى ونەركاسiپ كولەمi 2016 جىلمەن سالىستىرعاندا 20,8%-عا ءوسىپ, 5,7 ترلن تەڭگە بولدى. ەلباسى ايتقانداي, «كول-كوسىر مۇنايدىڭ ءداۋىرى اياقتالىپ كەلەدى». جوعارى ەڭبەك ونىمدىلىگى بار وڭدەۋ سەكتورىن دامىتۋدى باعدارعا الۋ ماڭىزدى. وڭدەۋ ونەركاسىبىندەگى ەڭبەك ونىمدىلىگى ءبىرىنشى جارتىجىلدىقتا 33,8 مىڭ اقش دوللارىن قۇرادى. قۇنى 5 ملرد تەڭگە بولاتىن 344 جۇمىس ورنى اشىلىپ, بەس جوبا ىسكە قوسىلدى. مۇنداي يگىلىكتەردىڭ ءبارى بيىل دا جالعاسىن تابادى», دەدى اكتيۆ جيىنىندا ءوڭىر باسشىسى.
الەۋمەتتىك سالاعا ايرىقشا نازار
جولداۋدا ورتا ءبىلىم بەرۋ سالاسىندا جاڭارتىلعان مازمۇنعا كوشۋدى ساپالى ۇيىمداستىرۋ, ونداعى جاڭا باعدارلامالاردى جاساۋ, وقۋلىقتار, ستاندارتتار جانە كادرلار دايارلاۋ ماسەلەلەرىنە ءمان بەرىلگەن. وسى باعىتتا اتىراۋدا دا ءبىلىم بەرۋ جۇيەسى جاڭارتىلعان ءبىلىم بەرۋ مازمۇنىنا كەزەڭ-كەزەڭىمەن كوشۋ جۇمىستارىن باستادى. ورتا ءبىلىم بەرۋ مازمۇنىن جاڭارتۋ شەڭبەرىندە وبلىس بويىنشا 4 586 پەداگوگ بىلىكتىلىكتى ارتتىرۋ كۋرستارىنان ءوتتى.
وبلىستا 193 مەكتەپتىڭ 189-ى ينتەرنەتكە, ونىڭ ىشىندە 141-ءى كەڭ جولاقتى ينتەرنەتكە قوسىلعان. شالعاي ەلدى مەكەندەردە ورنالاسقان 21 شاعىن جيناقتى مەكتەپ ينتەراكتيۆتى قۇرالدارمەن جابدىقتالىپ, اتىراۋ قالاسىنىڭ 10 مەكتەبىندە «روبوتتى-تەحنيكا» كۋرسى قاناتقاقتى جوبا رەتىندە باستاۋ الىپ, ناتيجەسىندە 12 وقۋشى رەسپۋبليكالىق جانە 6 وقۋشى حالىقارالىق “Infomatrix” وليمپياداسىنان جۇلدەلى ورىن الدى.
ەلباسى جولداۋدا حالىقتىڭ ءومىر ءسۇرۋ ۇزاقتىعىن, اۋرۋدى الدىن الۋ ارقىلى ءومىر ساپاسىن ارتتىرۋ ماسەلەسىنە اسا نازار اۋدارعان. دەموگرافيالىق كورسەتكىشتەر بويىنشا وتكەن جىلى وڭ سەرپىنگە قول جەتكىزىلدى. 2016 جىلمەن سالىستىرعاندا بالا ءولىمى 15,2%-عا تومەندەدى, ونكولوگيالىق اۋرۋدان ءولىم كورسەتكىشى 17,9%-عا, قان اينالىم جۇيەسىنىڭ اۋرۋىنىڭ كورسەتكىشى 9,5%-عا, تۋبەركۋلەزدەن ءولىم كورسەتكىشى 40,9%-عا, انا ءولىمى 30,1%-دان 12,3%-عا تومەندەدى. دەنساۋلىق ساقتاۋ سالاسىن تسيفرلاندىرۋ باعدارلاماسى اياسىندا 34 باعىنىستى مەديتسينالىق ۇيىمداردا مەديتسينالىق اقپاراتتاندىرۋ جۇيەسى ەنگىزىلىپ, تولىقتاي قامتىلدى. قالالىق ەمحانالاردا ەلەكتروندىق كەزەك جۇيەسى ەنگىزىلگەن.
2017 جىلعى جەرگىلىكتى اتقارۋشى ورگانداردىڭ اتقارعان شارالارى ناتيجەسىندە ءۇشىنشى توقساننىڭ قورىتىندىسىمەن جۇمىسسىزدىق دەڭگەيى 4,9 پايىزدى قۇرادى, جالپى وبلىستىڭ ەڭبەك نارىعىنداعى جاعدايى تۇراقتى.
اتىراۋ – تۋريستەرگە تارتىمدى ايماق
ءوڭىردىڭ تۋريستىك ءونىمىنىڭ بىرەگەيى – ورتاعاسىرلىق سارايشىق تاريحي قالاشىعىنىڭ ورنى. بۇل تاريحي ورىندا «ورتاعاسىرلىق سارايشىق» كەشەنىن سالۋ جوباسى ازىرلەنىپ, بۇگىنگى كۇنى اتالعان جوبانىڭ جوبالاۋ-سمەتالىق قۇجاتتاماسى جاساقتالۋدا. سونداي-اق جىلىوي اۋدانىندا اۋليە بەكەت اتانىڭ تۋعان جەرى «اقمەشىت» كەشەنى ورنالاسقان. وسى نىسانعا قاتىناۋ ماقساتىندا قازىرگى ۋاقىتتا 30 شاقىرىم تاس جول قۇرىلىسى اياقتالدى, قالعان 34 شاقىرىم جول ۋچاسكەسىنە جوبالاۋ-سمەتالىق قۇجاتتاماسى ازىرلەنىپ جاتىر.
حالىقپەن كەرى بايلانىستى جاقسارتۋ ماقساتىندا ايماقتا ءبىراز شارا قولعا الىندى. Telegram قوسىمشاسىندا چات-ارنا اشىلدى. 12 قاڭتارعا دەيىن مەملەكەتتىك ورگانداردىڭ ءبىرىنشى باسشىلارى, بارلىق دەڭگەيدەگى اكىمدەر جانە ورىنباسارلارىمەن 1000-نان استام وتىنىشكە جاۋاپ بەرىلدى. اتىراۋ وبلىستىق اكىمدىگى «اتىراۋ تسيفرلى قابىلداۋ» موبيلدىك قوسىمشاسىن ىسكە قوستى, ول دا تۇرعىنداردىڭ مەملەكەتتىك ورگاندارمەن بايلانىسىن وڭتايلاندىرۋعا باعىتتالعان. مۇنىڭ بارلىعى وبلىستا بۇقارا مەن مەملەكەتتىك ورگاندار اراسىنداعى سەنىمدىلىكتى نىعايتۋعا وڭ اسەرىن تيگىزەدى.
«پرەزيدەنت جولداۋىن ىسكە اسىرۋ – ورتاق مىندەت. مەملەكەتتىك ورگاندار, كاسىپكەرلەر, قوعامدىق سەكتور, بارلىق ازاماتتار, ۇلكەنىمىز بار, كىشىمىز بار جۇمىلىپ وسىعان قول جەتكىزە الامىز. ەڭ باستىسى, اۋىزبىرلىك, قاجىرلى ەڭبەك كەرەك», دەگەن ن.نوعاەۆ جولداۋدا كورسەتىلگەن مىندەتتەر بويىنشا جاۋاپتى ادامدارعا ناقتى تاپسىرمالار بەردى.
باقىتگۇل باباش, «ەگەمەن قازاقستان»
اتىراۋ