جىل سايىنعى اسكەري-پاتريوتتىق جاستار جيىنىن وتكىزۋدىڭ نەگىزگى ماقساتى اسكەري قىزمەتتى ناسيحاتتاۋ, قازاقستان رەسپۋبليكاسى قارۋلى كۇشتەرىنىڭ ءيميدجىن ارتتىرۋ, ءارتۇرلى ەلدەردىڭ جاس ارمياشىلارى بىرلەستىكتەرى اراسىنداعى ىنتىماقتاستىقتى نىعايتۋ بولىپ تابىلادى.
بيىل اتالمىش اسكەري-پاتريوتتىق جيىن العاش رەت حالىقارالىق دەڭگەيدە, رەسەي فەدەراتسياسىنان كەلگەن كوماندانىڭ قاتىسۋىمەن وتكىزىلگەلى وتىر. سونداي-اق, جيىن باقىلاۋشىسى رەتىندە وزبەكستاننان ارنايى قوناقتار شاقىرتىلعان.
بيىلعى جىلى جيىنعا 600-دەن اسا قاتىسۋشى قاتىسۋدا. ولاردىڭ قاتارىندا رەسپۋبليكا وڭىرلەرىندەگى اسكەري-پاتريوتتىق كلۋبتاردىڭ تاربيەلەنۋشىلەرى, استانا, شىمكەنت, الماتى, قاراعاندى قالالارىنداعى «جاس ۇلان» رەسپۋبليكالىق اسكەري مەكتەپتەرىنىڭ, «ارىستان» مامانداندىرىلعان ليتسەيىنىڭ, پاۆلودار قالاسىنداعى اسكەري مەكتەپ-ينتەرناتىنىڭ, سەمەي قالاسىنداعى مامانداندىرىلعان «جاس ۇلان» ەر بالالار مەكتەبىنىڭ تاربيەلەنۋشىلەرى جانە رەسەي فەدەراتسياسى ورىنبور پرەزيدەنتتىك كادەت ۋچيليششەسىنىڭ تاربيەلەنۋشىلەرى بار.
«ايبىن» جاستار جيىنى ماۋسىمنىڭ 13-ءى مەن 17-ءى ارالىعىندا ءتورت كۇنگە سوزىلادى. جيىن باعدارلاماسىنا ء«بىلىمدار» زياتكەرلىك ويىنى, ءوز جەتىستىكتەرىنىڭ كورمەسىن وتكىزۋ, وڭىرلەر مەن وقۋ ورىندارىنىڭ تانىستىرۋ ءراسىمى, روبوتتى تەحنيكا بويىنشا «مەنىڭ روبوتىم» بايقاۋى, اسكەريلەندىرىلگەن كروسس, ارقان تارتۋ, پنەۆماتيكالىق ۆينتوۆكادان وق اتۋ, «ايبىن داۋىسى» فەستيۆالىنىڭ مەگا-ارتى, پەينتبولدى كوماندالىق قۇرامدا ويناۋ, اسكەريلەندىرىلگەن ەستافەتا جانە «World of tanks» كومپيۋتەرلىك ويىنى ەنگىزىلدى. جيىن بارىسىندا بالالار بىرەگەي دايىندىق مەكتەبىنەن ءوتىپ, قازاقستاندىق ارميانىڭ زاماناۋي تەحنيكاسى مەن قارۋ-جاراعىن تاماشالاپ, وزدەرىنىڭ كۇشتەرى مەن مۇمكىندىكتەرىن سىناپ كورەدى. سونداي-اق تاجىريبە جيناقتاپ, جاڭا دوستار تاپپاق.
ميراس اسان, «ەگەمەن قازاقستان»
قاراعاندى وبلىسى.