پەيزاجدىق سۇڭعات ونەرىندەگى قازىرگى سۇڭعىلا سۋرەتشىلەردىڭ جايلاۋىنا جايىق كۇشىكباەۆتىڭ ءوز قوسىن تىككەلى دە شيرەك عاسىرعا تاياپ قالدى. سودان بەرى 1 مىڭنان استام سۇڭعاتتىق تۋىندىلاردى دۇنيەگە كەلتىرىپتى. قانشاما رەسپۋبليكالىق ءھام حالىقارالىق كورمەلەرگە قاتىسىپتى. ەرتەلى-كەش تابيعات اياسىنان سىر تارتىپ, شابىت شاقىرعان تىنىمسىز ەڭبەگىن ۇلاعاتتى وردا – ت.جۇرگەنوۆ اتىنداعى ۇلتتىق ونەر اكادەمياسىنداعى جالىقتىرماس ۇستازدىعىمەن دە قاتار الىپ كەلەدى.
جەر جانناتى جەتىسۋ, ونىڭ ىشىندە سارقان اتىرابى, باقالىنىڭ بالاسى ارمانشىل بولىپ ءوستى. ءانشى دە بولعىسى كەلگەن, مۋزىكامەن دە اۋەستەنگەن. اۋىلدى ءۇش جاعىنان تاۋلار قورشاپ تۇر. ءتورتىنشى جاعى بوس. مىنە, سول جاقتاعى اسپان قالاي قۇلاپ كەتپەي تۇر دەپ كىشكەنتاي كەزىندە ميىن تالاي قاتىرعان جايىقتىڭ كوڭىلى كەلە-كەلە سۋرەتشىلىككە ءبىرجولا قۇلاعان. اۋىل بالاسى ارمانعا جەتۋ جولىندا تاباندى بولىپ شىقتى. ماسكەۋدەگى ۆگيك-ءتىڭ كوركەمسۋرەت فاكۋلتەتىنە ءتۇسۋ ءۇشىن نەبىر قيىندىقتارعا ءتوزدى. ماسكەۋدەن كەتپەي, ەكى جىلداي كۋرسك ۆوكزالىندا اۋلا سىپىرۋشى بولىپ ىستەپ, ايتەۋىر, تۇياق ىلىكتىرگەن.
ساحي رومانوۆتىڭ «جايلاۋداعى كەش» اتتى پەيزاجدىق سۋرەتىنە قاتتى قىزىعاتىن. سوندايدا ساحي اعاسى ايتاتىن: «ءاي, جايىق, ءومىر قامشىنىڭ سابىنداي قىسقا. بۇل ومىردە كەڭ جول الما. ءوزىڭنىڭ جىڭىشكە سۇرلەۋىڭدى تاپ», دەيتىن. جايىق اعا اقىلىن تىڭدادى. ءار سالانىڭ باسىن ءبىر شالمادى. تاريحي تاقىرىپتارعا دا بارمادى. پەيجازدى تاڭداپ, سۋرەتشىلىكتەگى ناق وسى سۇرلەۋىن كەڭەيتىپ دامىتا بەردى.
شابىتىنىڭ قاينار كوزى – تابيعات. اسىرەسە, الاتاۋدىڭ قويناۋى, قولتىق-قونىشى. اساي-مۇسەيىن الىپ, ماشينەسىنە ءمىنىپ تابيعات اياسىنا تاڭەرتەڭ كەتكەن جايىق كەش تۇسپەي ۇيگە قايتپايدى. ويتكەنى, ول سۇلۋلىقتى جۇمىسكەر قولدار جاسايتىنىن جاقسى بىلەدى. كەنەبىن كەرىپ تابيعاتتىڭ شىنايى بەينەسىن كوشىرەدى. تابيعاتقا قۇشىرلانىپ قاراعان سايىن ايتەۋىر جاڭا بىردەڭە تاپپاي قويمايدى. كەيدە كۇنى بويى ىشىندە جۇرگەندە سويلەمەگەن تابيعاتتىڭ ۇيگە كەلگەسىن, شەبەرحانادا سويلەپ, جىرلاپ قويا بەرەتىنى بار. ونەر تىلسىمى, شابىت قۇدىرەتى وسى شىعار. قيساپسىز ەتيۋدتەر, قۇيىلىپ تۇسكەن پەيزاجدىق كارتينالار وسىلاي تۋادى.
رەسەيلىك سامارين دەگەن سۋرەتشى: «ءۇلكەن كارتينالار جاز. ۇلكەن نارسە ۇلكەننەن شىعادى», دەيدى ەكەن. جايىق كۇشىكباەۆ بۇل قاعيدانى دا ويعا بەك تۇيگەن. ونەرتانۋ كانديداتى و.باتۋرينا: «جايىق كۇشىكباەۆ – كۇيكى تىرلىكتەن جوعارى تۇرعان, كەڭ ءورىستى, پانورامالى پەيزاجدىڭ شەبەرى. ول تابيعاتتى جاي قىزىقتاماي, ۇلكەن كەڭىستىك ارقىلى تۋعان جەرگە دەگەن سۇيىسپەنشىلىككە تولى جۇرەك ءلۇپىلىن, جان سەزىمىن قاپىسىز بىلدىرەدى», دەپ باعالايدى. «قىرعاۋىلدىداعى كەش», «قىسقى پەيزاج», «انامنىڭ پورترەتى» جانە باسقا كارتينالارىنان وسى قاسيەت انىق بايقالادى.
جايىق استە سالىپ جاتقان سۋرەتىن تەز بىتىرەيىنشى دەپ ويلامايدى, ساتۋعا ءوتىمدى بولسىن دەپ جان سالمايدى. وزىمەن ءوزى, تابيعي تۇردە تولعاعى جەتىپ ءبىتۋىن قالايدى. سودان دا جاساندىلىققا, جىلتىراققا ۇرىنباي, تابيعات بولمىسىن ءارى قاراپايىم, ءارى شىنايى كەسكىندەيدى. سول ءۇشىن دە ونى سۋرەتشى جولداستارى «پەيزاجدىڭ بەيىمبەتى» دەپ اتاپ كەتكەن. بۇل اتاقتى جايىق كۇشىكباەۆ بۇكىل شىعارماشىلىعىمەن, جان دۇنيەسىنىڭ سۋرەت ونەرىنە مەيلىنشە ادالدىعىمەن اقتاپ تا كەلەدى.
قورعانبەك امانجول,«ەگەمەن قازاقستان»