تۇركسوي باس حاتشىلىعىنىڭ عيماراتىندا باستالعان باعدارلاما اياسىندا الدىمەن احمەت جۇبانوۆتىڭ ءومىرى مەن شىعارماشىلىعىنا ارنالعان «احمەت جۇبانوۆ: كۇيگە اينالعان ءومىر» اتتى كورمەنىڭ اشىلۋ ءراسىمى ءوتتى. سالتاناتتى راسىمدە ءسوز سويلەگەن تۇركسوي باس حاتشىسىنىڭ ورىنباسارى سايت يۋسۋف كومپوزيتور احمەت جۇبانوۆتىڭ قازاقستاننىڭ عانا ەمەس, كۇللى تۇركى الەمىنىڭ ورتاق مادەني مۇراسىنىڭ كورنەكتى وكىلدەرىنىڭ ءبىرى ەكەنىن اتاپ ءوتتى. ۇلى دالا ءۇنىن نوتاعا ءتۇسىرىپ, ۇلتتىق وي-سانامىزدى ونەر تىلىمەن كەلەشەك ۇرپاققا اماناتتاعان تۇلعادان قالعان تەڭدەسسىز مۇرانى بىرگە ۇلىقتاپ, تامىرى تەرەڭ مادەني بايلانىستاردى جاڭعىرتۋ تۇركسوي ءۇشىن ۇلكەن مارتەبە ەكەنىن جەتكىزدى. كورمەدەن كەيىن جۇبانوۆتىڭ ءومىر جولى مەن ونەردەگى ءورىسىن باياندايتىن ارنايى دەرەكتى فيلم كورەرمەن نازارىنا ۇسىنىلدى.
قازاقستان مەن تۇركيانىڭ عىلىم جانە مادەنيەت سالاسى وكىلدەرىنىڭ قاتىسۋىمەن وتكەن حالىقارالىق دوڭگەلەك ۇستەل احمەت جۇبانوۆتىڭ تۇركى دۇنيەسىنىڭ مۋزىكا مادەنيەتىنە قوسقان ۇلەسىنە ارنالدى.
تۇركيانىڭ تۇركسوي-داعى وكىلى كۋتالمىش يالچىن احمەت جۇبانوۆتىڭ حالىق مۋزىكاسىن تەك ونەر تۋىندىسى رەتىندە عانا ەمەس, ۇلتتىڭ رۋحاني الەمى مەن مادەني بولمىسى دەپ باعالاعانىن ءبىلدىردى. سونداي-اق كومپوزيتور مۇراسى كۇللى تۇركى الەمىنىڭ ورتاق رۋحاني بايلىعى ەكەنىن باسا ايتتى. ال انكارا مۋزىكا جانە بەينەلەۋ ونەرى ۋنيۆەرسيتەتىنىڭ رەكتورى ەرحان وزدەن تۇركيادا ءبىلىم الىپ جاتقان تۇركى دۇنيەسى جاستارىنىڭ سانى ارتىپ كەلە جاتقانىنا نازار اۋدارىپ, مۋزىكا مەن ونەردىڭ ادامداردى وتكەندى بولاشاققا جالعايتىن ماڭىزدى دانەكەر ەكەنىن, مۇنداي ءىس-شارالاردىڭ ورتاق قۇندىلىقتاردى بەكەمدەي تۇسەتىنىن جەتكىزدى. قازاقستاننىڭ انكاراداعى ەلشىلىگىنىڭ كەڭەسشىسى ايان قولباي وشپەس مادەني مۇرانىڭ تاريحي مانىنە توقتالدى.
«ۇلتتىق مادەنيەتىمىزدىڭ جاناشىرى ءارى قازاق مۋزىكا تاريحىنىڭ سونبەس جۇلدىزى احمەت جۇبانوۆتىڭ شىعارمالارى شەكارادان اسىپ, باۋىرلاس ەلدەرىمىز اراسىندا التىن كوپىر بولۋىن جالعاستىرىپ كەلەدى. ونىڭ قالدىرعان تەڭدەسسىز مادەني مۇراسى تۇركى الەمىنىڭ ورتاق بايلىعى رەتىندە عاسىرلار بويى جاساي بەرەدى», دەدى ول.
جيىندا قازاقستاننان بارعان دەلەگاتسيا وكىلدەرى دە مازمۇندى بايانداما جاساپ, ۇلتتىق مۋزىكا تاريحىنان سىر شەرتتى. مادەنيەت جانە اقپارات مينيسترلىگىنىڭ وكىلى دينارا سابيروۆا كوپتەگەن ۇلتتىق مۋزىكا تاريحىندا حالىقتىق ءداستۇر مەن كاسىبي ونەرى اراسىندا التىن كوپىر ورناتقان تۇلعانىڭ ءبىرى احمەت جۇبانوۆ ەكەنىن اتاپ ءوتتى. ال ۇلتتىق ورتالىق مۋزەي ديرەكتورى سەرجان ساروۆ مۋزىكانى حالىق جانىنىڭ ءۇنى دەپ باعالاپ, جۇبانوۆتىڭ بۇكىل سانالى عۇمىرىن قازاق مۋزىكاسىن زەرتتەۋگە, جۇيەلەۋگە, ونى الەمگە تانىتۋعا ارناعانىن جەتكىزدى.
مەرەيتويلىق ءىس-شارالار لەگى انكارا مۋزىكا جانە بەينەلەۋ ونەرى ۋنيۆەرسيتەتىنىڭ مۇزاففەر سارىسوزەن اتىنداعى امفيتەاترىندا ۇيىمداستىرىلعان كونتسەرتتىك باعدارلامامەن جالعاستى. قۇرمانعازى اتىنداعى قازاق ۇلتتىق حالىق اسپاپتار وركەسترى قالانىڭ ونەرسۇيەر قاۋىمىنا اسەرلى كەش سىيلادى. ساحنادا قۇرمانعازىنىڭ «اداي», سۇگىردىڭ «ىڭعاي توك», جاماعات تەمىرعاليەۆتىڭ «باقتىبايدىڭ اۋەنى», باسقا دا كۇيلەر ورىندالدى.
