فوتو: gov.kz
فەستيۆالدىڭ اشىلۋىنا قوستاناي وبلىسىنىڭ اكىمى قۇمار اقساقالوۆ قاتىسىپ, بۇگىندە تەحنولوگيالار مەن جاساندى ينتەللەكتىنى دامىتۋ ءوڭىردىڭ جانە تۇتاس ەلدىڭ باسەكەگە قابىلەتتىلىگىن ايقىندايتىن باستى فاكتورلاردىڭ بىرىنە اينالعانىن اتاپ ءوتتى.
«بۇگىندە تسيفرلاندىرۋ, روبوتتاندىرۋ جانە جاساندى ينتەللەكت ءوندىرىس, اۋىل شارۋاشىلىعى, دەنساۋلىق ساقتاۋ, ءبىلىم بەرۋ جانە قىزمەت كورسەتۋ سالالارىنا كەڭىنەن ەنىپ وتىر. ءبىزدىڭ باستى مىندەتىمىز – ءبىلىم ەكونوميكاسىن قالىپتاستىرىپ, جاڭا بۋىن ماماندارىن دايارلاۋ», دەدى ءوڭىر باسشىسى.
فەستيۆالگە نوبەل سىيلىعىنىڭ 2007 جىلعى لاۋرەاتى, وڭتۇستىككورەيالىق ديپلومات جانە عالىم را كۆون چۋنگتىڭ ونلاين بايلانىس ارقىلى قوسىلدى.
كىتاپ وقۋعا قۇشتارلىق: قوستانايداعى كىتاپحاناشىلار اۋلەتىنىڭ ونەگەسى
ءوز سوزىندە ول تەحنولوگيالىق دامۋدىڭ تۇراقتى دامۋ جانە ەكولوگيالىق جاۋاپكەرشىلىكپەن تىعىز بايلانىستا ءجۇرۋى قاجەتتىگىن ەرەكشە اتاپ ءوتتى.
«ەكونوميكالىق ءوسىم بولاشاق ۇرپاق الدىنداعى جاۋاپكەرشىلىك پەن قورشاعان ورتاعا دەگەن قامقورلىقتان تۇرادى, دەدى نوبەل لاۋرەاتى فەستيۆال قاتىسۋشىلارىنا ارناعان ۇندەۋىندە.
وسىنداي حالىقارالىق دەڭگەيدەگى سپيكەردىڭ قاتىسۋى فورۋمنىڭ مارتەبەسىن ارتتىرىپ, ونى تەحنولوگيالار مەن بولاشاق ماسەلەلەرى جونىندەگى جاھاندىق ديالوگ الاڭى رەتىندە ايقىنداي ءتۇستى.
قازىر فەستيۆال اياسىندا ينتەراكتيۆتى ايماقتار, زاماناۋي تەحنولوگيالار كورمەسى, VR جانە AI الاڭدارى, روبوتوتەحنيكا زەرتحانالارى, كيبەرسپورت ارەناسى, بالالار مەن ەرەسەكتەرگە ارنالعان عىلىمي شوۋلار جۇمىس ىستەپ جاتىر.
قوناقتاردىڭ ەرەكشە قىزىعۋشىلىعىن ۆيرتۋالدى شىندىق ارقىلى اۋىل شارۋاشىلىعى تەحنيكاسىن باسقارۋ, ەلەكتروموبيل قۇراستىرۋ جەلىلەرىنىڭ سيمۋلياتسياسى جانە ينجەنەرلىك شەبەرلىك ساباقتارى تۋدىرىپ وتىر.
