كوگالداندىرۋ ناۋقانىنا قالا اكىمى اسحات بەردىحانوۆ, الماتى وبلىسى اكىمىنىڭ ورىنباسارى باقىتنۇر باقىت ۇلى, ءماسليحات دەپۋتاتتارى, قحا وكىلدەرى, اكىمدىك ماماندارى, اقساقالدار, ەرىكتىلەر مەن جاستار بەلسەنە قاتىستى.
«مەملەكەت باسشىسىنىڭ «تازا قازاقستان» باستاماسى ۇلتتىق يدەولوگيامىزدىڭ اجىراماس بولىگىنە اينالدى. بىلتىر وبلىستا ەكولوگيالىق اكتسياسى اياسىنداعى ءىس-شارالارعا 849 مىڭنان استام ادام, 8 800 كاسىپورىن مەن ۇيىم قاتىستى. ناتيجەسىندە, 17 500 توننا قوقىس جينالىپ, 109 800 اعاش وتىرعىزىلدى. الداعى ەكى اي ىشىندە اتالعان اكتسيا بارلىق اۋدان مەن قالالاردا وتەدى», دەدى ب.باقىت ۇلى.
بىلتىر قوناەۆ قالاسىندا 30 مىڭعا جۋىق اعاش, 60 مىڭنان استام گۇل ەگىلگەن ەكەن. بۇل جۇمىس بيىل دا جالعاساتىنىن تىلگە تيەك ەتكەن قالا اكىمى جۋىردا قالاعا كىرەبەرىس تۇستا 7 مىڭ اعاش ەگىلىپ, جاڭا ساياباق اشىلاتىنىن ايتتى. بۇدان بولەك, «كوشپەلىلەر قالاشىعىنىڭ» اۋماعىنا 3 مىڭ اعاش وتىرعىزىلادى. جالپى, جىل سوڭىنا دەيىن قالاداعى جاسىل جەلەك سانى 20 مىڭعا كوبەيەدى.
«قالا كەلبەتىن جاقسارتۋ باعىتىندا تالاپتار دا كۇشەيتىلدى. ەندى جاڭا نىسان سالعان ءاربىر قۇرىلىس كومپانياسى ونىڭ اۋماعىن مىندەتتى تۇردە كوگالداندىرۋعا ءتيىس. بۇل باستاما الداعى ۋاقىتتا قوناەۆتى جاسىل ءارى جايلى قالاعا اينالدىرۋعا جول اشادى», دەدى شاھار باسشىسى.
كوگالداندىرۋ اكتسيالارىنا جاستار دا بەلسەنە قاتىسۋدى اينىماس داستۇرگە اينالدىرعان. «Paryz eriktileri» جاستار قوعامدىق بىرلەستىگىنىڭ توراعاسى ادىلەت ايتقازى مۇنداي يگى ىستەن جاستار شەت قالماي, الداعى سەنبىلىكتەردە دە بەلسەندىلىك تانىتانىنا سەنىم ءبىلدىردى.
