ساراپشىلاردىڭ پىكىرىنشە, بۇل كولەمدەگى اۆتوكولىكتەردىڭ جاپپاي رەسەيدەن قازاقستان نارىعىنا جەتكىزىلۋىن كۇتۋگە نەگىز جوق. مامانداردىڭ ەسەبىنشە, قازاقستانعا بۇرىن ايدالعان كولىكتەردىڭ تەك 20 پايىزدان استامى كەلەدى.
«ماسەلەن, نارىقتا اۆتوكولىكتىڭ باعاسى 10 ملن تەڭگە دەلىك. ەگەر ولار ونى 40 پايىز جەڭىلدىكپەن ۇسىنسا, تۇتىنۋشى, ارينە, بارىپ ساتىپ الۋى مۇمكىن, بىراق بۇل جاعدايدا قوسىلعان قۇن سالىعىن تولەۋگە تۋرا كەلەدى. ققس مولشەرى دە ارتادى. سوندىقتان ءبارى باعانىڭ قانشالىقتى تارتىمدى بولۋىنا بايلانىستى. دەگەنمەن ليزينگ بەرۋشىلەر كولىكتى وزدەرىنە زيان كەلتىرەتىندەي تىم ارزان باعامەن ساتا قويادى دەپ ويلامايمىن», دەيدى «جالپى جول» جول قوزعالىسى قاۋىپسىزدىگى قاۋىمداستىعى» قوعامدىق بىرلەستىگىنىڭ پرەزيدەنتى ارسەن شاكۋوۆ.
اۆتوكولىكتەردىڭ نەگىزگى بولىگىن رەسەيلىك تۇتىنۋشىلار ساتىپ الۋى ىقتيمال. سەبەبى رەسەيدىڭ ءوز ىشىندە بۇل ماشينالار قوسىمشا شىعىنسىز, ياعني قوسىلعان قۇن سالىعى مەن كەدەندىك باجسىز, ايتارلىقتاي ارزانعا تۇسەدى.
سونىمەن قاتار 2026 جىلى رەسەيدەگى تاكسوپاركتەر ءوز وندىرىسىندەگى اۆتوكولىكتەرگە كوشۋى ءتيىس. بۇل نارىققا 800 مىڭعا دەيىن پايدالانىلعان شەتەلدىك كولىكتىڭ شىعۋىنا اكەلۋى مۇمكىن. ساراپشىلاردىڭ ايتۋىنشا, بۇل ماشينالاردىڭ ءبىر بولىگىن تاكسي جۇرگىزۋشىلەرىنىڭ ءوزى ساتىپ الادى, ال نەگىزگى ۇلەسىن سوڭعى بىرنەشە جىل بويى اۆتوكولىك تاپشىلىعىن سەزىنىپ وتىرعان رەسەيدىڭ ىشكى نارىعى سىڭىرەدى.
«بۇل اۆتوكولىكتەردى ىشكى نارىق وڭاي قابىلدايدى دەپ ويلايمىن ءارى سۇرانىس تا جوعارى بولادى. سەبەبى تاكسي سالاسىندا نەگىزىنەن ەكى-ءۇش جىل عانا پايدالانىلعان, اسا ەسكى ەمەس كولىكتەر قولدانىلادى. بۇل – رەسەي نارىعى ءۇشىن وتە تارتىمدى سەگمەنت. سوندىقتان ولار نەگە بىزگە كەلۋى كەرەك؟ قازاقستاندا اۆتوكولىك تاپشىلىعى جوق, كەرىسىنشە, جاڭا زاۋىتتار سالىنىپ جاتىر», دەيدى اۆتوcاراپشى الەكسەي الەكسەەۆ.
دەگەنمەن بۇل اۆتوكولىكتەردىڭ بەلگىلى ءبىر بولىگى قازاقستان نارىعىندا دا پايدا بولۋى مۇمكىن. الايدا ۋتيل الىمى مەن كەدەندىك باج سالىعىنا بايلانىستى كولىكتەردى ەلگە اكەلۋ ءالى دە قىمبات بولىپ وتىر. سول سەبەپتى, مامانداردىڭ ايتۋىنشا, قازاقستانعا تەك جەكە جەتكىزىلىمدەر, ارنايى تاپسىرىستار, سيرەك مودەلدەر نەمەسە وتاندىق نارىقتا بالاماسى جوق قوزعالتقىشى بار اۆتوكولىكتەر اكەلىنەدى.
