وتىرىس بارىسىندا وڭدەۋشى ونەركاسىپتىڭ جاي-كۇيىنە ەرەكشە نازار اۋدارىلدى. جىل باسىنان بەرگى 11 ايدىڭ قورىتىندىسىندا سالاداعى ناقتى كولەم يندەكسى 105,9 پايىزدى قۇرادى. ال بيىلعى جىلدىڭ قورىتىندىسىندا وڭدەۋشى ونەركاسىپتە ءوسىم شامامەن 6 پايىز دەڭگەيىندە بولادى دەپ كۇتىلىپ وتىر.
بيىل نەگىزگى وڭدەۋ سالالارىنىڭ دامۋ بولجامىنا سايكەس وڭدەۋشى ونەركاسىپ قۇرىلىمىنىڭ 40 پايىزىن قۇرايتىن مەتاللۋرگيادا ءوسىم 1,1 پايىزدى قۇرايدى. ماشينا جاساۋ سالاسى (17,5%) 12 پايىزدىق ءوسىم كورسەتەدى دەپ جوسپارلانعان. تاماق ونەركاسىبىندە (13,1%) – 9 پايىز, قۇرىلىس ماتەريالدارىن وندىرۋدە (5,6%) – 6 پايىز, حيميا ونەركاسىبىندە (5,4%) – 6 پايىز, ال جەڭىل ونەركاسىپتە (0,7%) 5 پايىز ءوسىم كۇتىلەدى.
شتاب وتىرىسىندا وڭدەۋشى ونەركاسىپتىڭ ەكونوميكالىق ءوسىمنىڭ باستى درايۆەرلەرىنىڭ ءبىرى رەتىندەگى بولاشاعى جان-جاقتى تالقىلاندى. ءتۇستى جانە قارا مەتاللۋرگيانىڭ دامۋ پەرسپەكتيۆالارى, «بايتەرەك» حولدينگى ارقىلى قارجىلاندىرىلاتىن جوبالاردىڭ ىسكە اسىرىلۋ بارىسى, وڭىرلەردەگى ينفراقۇرىلىمنىڭ جاي-كۇيى مەن سالانىڭ تۇراقتى دامۋىنا ىقپال ەتەتىن وزگە دە فاكتورلار قاراستىرىلدى.
وڭىرلەردىڭ رەسۋرستىق جانە ينفراقۇرىلىمدىق الەۋەتىن ءتيىمدى پايدالانۋ قاجەتتىگىن ەسكەرە وتىرىپ, سەرىك جۇمانعارين كەلەسى جىلى وڭدەۋشى ونەركاسىپ سالالارىنداعى ءوسىم قارقىنىن قامتاماسىز ەتۋگە ارنالعان جول كارتاسىن ازىرلەۋدى تاپسىردى. قۇجاتتا ەكونوميكالىق وسىمگە اسا ماڭىزدى شارالارمەن قاتار, جەڭىل ونەركاسىپ پەن قۇرىلىس ماتەريالدارى ءوندىرىسىن قولداۋ تەتىكتەرى قامتىلماق.
ساۋدا سالاسىندا دا وڭ ديناميكا ساقتالىپ وتىر. 11 ايدىڭ قورىتىندىسى بويىنشا ناقتى كولەم يندەكسى 8,8 پايىزدى قۇراسا, جىل سوڭىندا بۇل كورسەتكىش 8,9 پايىزعا جەتەدى دەپ كۇتىلەدى. ساۋدا ءوسىمىنىڭ جيىنتىق ۇلەسىنىڭ شامامەن 72 پايىزى بەس وڭىرگە تيەسىلى.
اتاپ ايتقاندا, الماتى قالاسىندا ساۋدا كولەمى 24,6 ترلن تەڭگەنى قۇراپ, اۆتوموبيلدەر, ماشينالار مەن جابدىقتار, فارماتسەۆتيكالىق ونىمدەر مەن شوكولاد ساۋداسى باسىم بولدى. استانادا 10,9 ترلن تەڭگەگە تابيعي گاز, ديزەل وتىنى, اۆياتسيالىق بەنزين مەن كەروسين, ەت پەن ءسۇت ونىمدەرى ساتىلعان. اتىراۋ وبلىسىندا (6,7 ترلن تەڭگە) مۇناي ونىمدەرى مەن ماشينالار, قاراعاندى وبلىسىندا (4,5 ترلن تەڭگە) فارماتسەۆتيكالىق تاۋارلار, تەحنيكا جانە كوسمەتيكا ونىمدەرى, ال شىمكەنت قالاسىندا (3,6 ترلن تەڭگە) فارماتسەۆتيكا, جانار-جاعارماي مەن اگروونەركاسىپ كەشەنى ونىمدەرى نەگىزگى ۇلەس قوستى.
بولشەك ساۋدا قۇرىلىمىندا شامامەن 760 مىڭ بيزنەس سۋبەكتىسى جۇمىس ىستەيدى. جەكە كاسىپكەرلەردىڭ تاۋار اينالىمى 10 پايىزعا ءوسىپ, 8,2 ترلن تەڭگەگە جەتتى. وپەراتيۆتى دەرەكتەرگە سايكەس 11 ايداعى ونلاين-ساتىلىم كولەمى 3,3 ترلن تەڭگەنى قۇراپ, وتكەن جىلدىڭ سايكەس كەزەڭىمەن سالىستىرعاندا 14,4 پايىزعا ارتتى.
اۋىل شارۋاشىلىعى سالاسى دا بارلىق باعىت بويىنشا تۇراقتى ءوسىم كورسەتۋدە.
11 ايدىڭ قورىتىندىسىندا ناقتى كولەم يندەكسى 106,1 پايىزدى قۇرادى. جىلدىق ءوسىم 5 پايىز دەڭگەيىندە بولجانىپ وتىر, بۇل جوسپارلى كورسەتكىشتەن 3 پايىزعا جوعارى.
رەسپۋبليكالىق ورتاشا دەڭگەيدەن جوعارى ءوسىم اقمولا (115,7%), قوستاناي (115,4%), سولتۇستىك قازاقستان (110,5%), پاۆلودار (108,2%) مەن اتىراۋ (107,4%) وبلىستارىندا تىركەلدى.
ءداستۇرلى داقىلداردان الىنعان تۇراقتى جوعارى ءونىم اياسىندا بيىلعى جىلى مايلى جانە بۇرشاقتى داقىلدار ايقىن ءوسىم نۇكتەسىنە اينالدى. بۇرشاقتى داقىلداردان رەكوردتىق – 1,1 ملن توننادان استام ءونىم جينالدى. ال مايلى داقىلدار ءوندىرىسى العاش رەت 4,7 ملن تونناعا جەتتى. ماقتا جيناۋ كولەمى 428 مىڭ توننانى قۇراپ, كەيىنگى 18 جىلداعى ەڭ جوعارى كورسەتكىشكە شىقتى. ونىمدىلىك گەكتارىنا 29,6 تسەنتنەر بولدى.
وسىلايشا, نەگىزگى سالالارداعى وڭ سەرپىن مەن ناقتى قولداۋ شارالارى الداعى جىلدارى ەكونوميكالىق ءوسىمدى تۇراقتى قامتاماسىز ەتۋگە نەگىز بولماق.
